غريبه الناس
-*-*-*-*-
طبعا ده عنوان اغنيه للمطرب وائل جسار
من اجمل الاغنيات اللى سمعتها فى حياتى
لما فكرت كده مع نفسى قولت ياترى يا هل ترى
هو فعلا الناس اللى بقيت غريبه او الدنيا اللى اتغيرت
بصراحه كده بيت الشعر اللى بيقول
نعيب زماننا والعيب فينا
وما لزماننا عيب سوانا
صح ميه فى الميه
الناس هى اللى بتتغير النفوس بقيت سيئه
اكيد مش كل الناس لكن عن جد نسبه كبيره منهم اوى اتغيروا
كل واحد تتكلم معاه تحس انه مظلوم مقهور فى حياته
طيب لما كل الناس مظلومه كده مين اللى ظلمهم
غريبه الناس
تعالوا نقرب اوى من جملة غريبه الناس
ياترى فكرت لما تغلط فى حق حد
تجرى بسرعه وتعتذر له وتقول له اسف
والله مش قصدى تزعل منى
او تقول خلاص بالسلامه يزعل او حتى يتفلق
غريبه الناس
ياترى لما ربنا ينعم عليك بحاجه كويسه
بتقول للناس اللى بتحبهم انه جه لك حاجه كويسه
او تقول يا عم بلاش دارى على شمعتك احسن برضه
غريبه الناس
ياترى لما تلاقى حد من الناس
اللى كانوا فى يوم قريبيبن منك
بقى بعيد ومش يسال فيك بتريح دماغك
وتقول كبر كبر يا عم الحاج
يسال او ان شا الله عن اهله ما سأل
طيب ما تروح تسأل انت تفهم ماله
ليه اتغير معاك ليه بقى بعيد عنك
غريبه الناس
لما تفشل قصة حب بتزعل
وتقول ياترى ممكن اقابل حد تانى
فى حياتى احبه ويحبنى
او تقول يلا بالسلامه يا حبيبى
والقلب كمان داعى لك
وبكره اقابل احسن منك مليون مره
وتنسى بسرعه حبيبك فى ثوانى
غريبه الناس
ياترى عمرك كنت قاعد مع ناس
واحد فيهم مش لاقى شغل
ولاقيت حد بيتكلم عن فضل العمل
وازاى هو شغله مريح ويتكلم ويتكلم
ومش بيراعى اى مشاعر
للشخص اللى موجود معاكم
غريبه الناس
دى بعض مواقف جت فى دماغى وانا بافكر فى جملة
غريبه الناس
اكيد فى غيرها كتير وكتير
كل واحد فيكم يتكلم بقى على المواقف الغريبه
سواء المواقف دى قابلها فى حياته
او سمع عنها او حتى هو عملها
او ممكن تكون اتعملت فيه
همسه فى اذن كل واحد فيكم
حاولوا تحافظوا على شعور الاخرين
لاننا بصراحه من غير ناس احنا مش نساوى اى شئ
ده المثل بيقول جنه من غير ناس ما تنداس
اكيد كل واحد فينا بيحتاج لوجود الناس فى حياته
علشان يحكى ويفضفض معاهم
حتى لو كان الكلام اللى هيقوله كلام خاص اوى
الوقت لسه امامكم حاولوا تصلحوا اى غلط حصل قبل كده
بلاش نقول غريبه الناس بالمعنى الوحش
تعالوا نقولها بالمعنى الحلو
يعنى الناس بقيت غريبه علشان بقينا نحب بعض اكتر
نخاف على بعض اكتر نفهم بعض اكتر
وغريبه الناس
كانت معاكم تتحدث عن أحوال الناس : زهراء
Read more...
