شكرا 2015 ...

>> الثلاثاء، 29 ديسمبر، 2015



أحبتى فى الله

ايام قليله نودع عام  ونستقبل الجديد

فى بداية كل عام تكون لنا الكثير من الامانى والاحلام

وفى السنه الجديده ادعو الله ان

يشفى المريض .. يفرج عن المكروب ...

 يهدى الضال ... يرد الغائب ...

 يرحم الميت ... ينصر المظلوم ...

  يسعد قلوبكم أينما كنتم 

فى عام 2015 دخل الى حياتى العديد من الاشخاص

وكذلك خرج منها القليل جدا ...

يظل هناك إنسان مكسب لى على المستوى الشخصى


ادعو الله ان تستمر صداقتنا الى ابد الدهر

هو مختلف بروحه وتميزه وحتى افكاره 

لا يعلم كمية الايجابيه التى يتحلى بها 

ربما جميع من دخلوا الى حياتى هذا العام متفردين

ولكن يظل أحدهم متفرد بأخلاقه وتعامله المثالى

لذا لابد ان أوجه الشكر الى 2015 برغم كل احداثها


العجيبه الغريبه كان هناك هديه فى صورة إنسان

اشكر كل من علمنى شئ جديد

اشكر كل من انسحب من حياتى بهدوء

لانه اعطى الفرصه الى دخول اشخاص أروع

اشكر كل من قال عنى كلمه سيئه حتى يأخذ من سيئاتى

الشكر لمن اعدنا العلاقات بيننا 

كل الشكر والدعوات لاسرتى واصدقائى المقربين 

الذين وقفوا معى فى ظروف ولحظات

 كنت على وشك الانهيار النفسي  فيها

ادعو  ان يحمل العام الجديد لهم 


لحظات مفرحه لم تكن فى الحسبان


فى انتظار فضفضه عن 2015


وامنيات واحلام للعام الجديد .....



عام كله خير عليكم وعلى احبابكم يارب 




Read more...

هى الدنيا جرى فيها ..... 1

>> الأحد، 29 نوفمبر، 2015



من كام اتصلت بيا سلوى احدى معارفى 

التى اتمتع بالحديث معها هى فتاه من اصول نوبيه

تحمل ملامح مصريه جميله وتحمل ايضا اخلاقيات رائعه

المهم سلوى منهاره نفسيا ..........

هى مرتبطه من حوالى اربع شهور بزميل  لها فى العمل

لغاية هنا الامور عاديه جدا جدا .....

فجأه كده وبدون مقدمات حاتم اللى هو زميلها


قالها انهم يبعدوا عن بعض

 وخلاص الامور بينهم مش هتنفع تكمل على كده 


ولما حبيت انها تفهم ايه السبب

كان السبب بكل بساطه ان والدته ووالده رفضوا سلوى

اه رفضوا ان سلوى تكون زوجه لابنهم 

ليه بقى عشان سلوى تحمل لون خمرى اقرب لاهل النوبه

تخيلوا ان ده السبب عشان اهل حاتم عاوزين ابنهم يتجوز

بنت قمر بيضا وشعرها اصفر وعيونها خضرا ...

 هى تعبانه نفسيا بسبب الرفض ده

حاولت اتكلم مع حاتم وافهم منه السبب الحقيقى 

اقسم لى بكل الايمانات ان ده السبب الحقيقى 

وان والده راح سال عن سلوى واهلها

 واكتشف انهم عيله قمه فى الاحترام

والتدين والاخلاق اللى مش متواجده دلوقتى

الاعتراض الوحيد انها سمرا ...

بصراحه كان نفسى اقوله نعم يا روح امك 

هو ده سبب ان البنت تترفض انها سمرا

هى الناس حصل لها ايه ؟؟؟

سلوى طبعا حالتها تصعب على اى حد

سي حاتم قرر انه يتنقل من شغله عشان يبعد عنها

عاوزه بقى رايكم بجد هو معقول زيجه تتفركش

عشان لون بشرة البنت او انها مش جميله 

هى التفاهه وصلت بينا لحد كده ؟؟؟

فى انتظار رأيكم .............. 

Read more...

طنط حشريه .... عمو فضولى ....

>> السبت، 17 أكتوبر، 2015


ايه ده انتى اتخطبتى ؟!! العريس بيشتغل ايه !!


الشبكه دهب او الماظ ؟؟؟ شقة العريس فين ؟؟؟؟



هتتجوزى امتى بقى ؟؟  هو بيشتغل فين وعنده كام سنه ؟؟


انتى عارفه ازاى توفقى بين شغلك وبين بيتك ؟؟؟


هو جوزك مش معترض عن شغلك ؟؟؟ 


عربيتك الجديده قسط او كاش ؟؟؟ ماما اللى جابتها ؟؟؟



انتى بتدفعى اقساط العربيه من مرتبك ؟؟؟


جوزك شكله كويس !!! بخيل كده ولا كريم ؟؟؟



مافيش حاجه جايه فى السكه ؟؟؟ 



انتى لازم  تجيبى عيل كمان عشان ابنك ما يترباش لوحده !!!


قدرتى تخسي ازاى كده ؟؟؟؟ 



انتى جسمك بقى مليان لازم تخسي شويه عشان صحتك !!!



ازاى قاعده لغاية دلوقتى من غير جواز ؟؟؟؟



عزيزتى طنط حشريه


عزيزى عمو فضولى



من فضلكم لو سمحتم انا بقيت شبه البنت اللى فى الصوره


لانى قرفت منكم ومن طريقة الاسئله دى


والحمد لله عندى امكانية الرد والغلاسه 


بس نظرتى لكم وعدم الرد ده احتقار مش اكتر او اقل 


نفسى كل واحد يبقى فى حاله وماحدش له دعوه بحد



ارحموناااااااااااااااااااااااااا 


Read more...

دنيتى اتغيرت ....

>> الثلاثاء، 15 سبتمبر، 2015







فى الحياه ... نعيش فترات ركوووود 



اللى ننام فيه نصحى ونلاقيه 



ولكن .... 



فجأه ..... 



يظهر فى حياتنا شئ يقلبها 



يجعل لها معنى .... قيمه 



قد يكون التغيير للافضل 



او لاقدر الله للاسوء 



ربما يجعلها حياه مليئه بالسعاده 



وربما يجعلها كلها تعب وحزن 




السؤال ما هو السبب الذى
 


جعلك تقول دنيتى اتغيرت ؟؟
 

ربما يكون التغيير فى خصله...

 

ربما يكون التغيير سلبى او ايجابى



قد يكون ....
 

عـــابر سبيل 



صديق قديم ...

 


كتاب قرأته ....

 

حكايه سمعتها من بطلها ...

 


موقف حدث لك ...

 

وفاة عزيز ...

 

بلاء لانسان ...




او ....

 


او ....
 


ياترى فعلا دنيتك اتغيرت
 



او لسه حياتك زى ما هى؟؟



Read more...

مش عيب ....

>> الثلاثاء، 25 أغسطس، 2015



مش عيب ان الناس تتكلم عنك

العيب ان الكلام يأثر فيك

مش عيب انك تتألم من جرح جوه منك

العيب ان مدة الوجع تتطول 


مش عيب انك تخسر او تنهزم

العيب انك تستسلم للخساره او تكسرك الهزيمه 


مش عيب ان الناس تلجأ لك فى مشاكلهم

العيب انك تردهم وماتوقفش معاهم

مش عيب اذا ابتعد عنك من اعتقدت انه حبيب

العيب ان حياتك توقف من بعدها 

مش عيب انك تكون فى محنه وماحدش حاسس بيك

العيب انك تنسى ان كل واحد فينا عنده ما يكفى من مشاكل وهموم  


مش عيب انك تحس انك بعيد عن ربنا لفتره ما

العيب ان الفتره تتطول وماتحاولش تساعد نفسك 

Read more...

لــو كنــت .........

>> السبت، 1 أغسطس، 2015




من شويه سرحت بخيالى وبصيت الى حوض السمك بتاعى


وهو بالمناسبه شبه اللى فى الصوره بالضبط



قولت لنفسى يا سلام لو كنت سمكه طول الوقت



ابلبط فى المايه ومش فارق معايا رطوبه او حرارة الجو


ضحكت فى سرى وقولت ليه سمكه صغننه كده


ابقى اسد ملك الغابه كل الحيوانات بتخاف منى 


لا خلينى جمل عشان يتحمل العطش ههههه


قعدت بقى اتخيل نفسى لو كنت حاجه تانيه 


وفى الاخر قررت انى ابقى بطه تعيش فى المايه


وتاكل سمك ولانى باعشق السمك قولت نتعلم العوم


الفكره تافهه جدا وخياليه عشان ماحدش يقولى


حرام وحلال ومش راضيه عن نفسك


ده مجرد دردشه مش اكتر ..........


كل واحد يتخيل كان يتمنى يبقى ايه غير انه انسان


وياريت اعرف اختيارك ليه ..........






Read more...

ذكــــريات ....

>> السبت، 13 يونيو، 2015






 العمر بيجرى زى القطار او زى الطياره

بمناسبة قرب دخول رمضان افتكرت ذكرياته


ورق رمضان اللى كنا بنعمله مع  اخويا اسلام

و محمد وهبه جيرانا  فى الشقه اللى جنبا ......

 ووليد وهبه فى البيت اللى امامنا ....


صوت المسحراتى وكان ينادى علينا 

فانوس رمضان اللى كان فانوس بجد مش مجرد لعبه

فاكره لما كنت انزل اصلى الفجر مع اسلام

صوت الشعرواى... الابتهالات ... خشاف ... قطايف

يااااااااااه ذكريات من زمن فات كل لما العمر يعدى عليا

اشتاق لبعض البشر رحلوا عن حياتى اولهم والدى الله يرحمه

كلماته ... نصايحه....... بسمته ... رجولته ..... 

لازلت ابحث عن رجل مثل يحمل صفاته 

الذاكره فيها ذكريات مع بشر رائعين وذكريات اروع

الذكريات السيئه حاولت اعمل لها ديليت مش ناويه افتكرها

البوست المفروض كان يبقى طويل عشان

احكى عن ذكريات كتير بس قولت ارغى فى التعليقات

يارب كل عام وكل واحد فينا بيحقق اكتر مما يتمنى

يارب حبايبى فى زياده على الدوام 

يلا نحكى مع بعض الذكريات اللى من زمن عدى وفات


ملحوظه سوف انقطع عن التدوين فترة شهر رمضان

وسوف اكون متابعه على قدر المستطاع ان شاء الله



Read more...

نقطة ضعفى ....

>> الثلاثاء، 2 يونيو، 2015



من حوالى خمس سنوات كنت فى كورس تنميه بشريه

وكنا بنتكلم عن نقطة الضعف وكل فرد فى المجموعه

بيحكى ويقول على نقطة ضعفه ولما جه الدور عليا

مستر سامح بص لى وقالى اكيد انتى مش عندك نقط ضعف

شخصيتك قويه وابتسم ... ساد الصمت لحظات كده

قولت له نقطة ضعفى المرض ........ قالى ازاى

قولت له لو اى حد اعرفه

 او كنت اعرفه وسمعت انه مريض

باحس بحاله غريبه جدا ....... 

حتى لو الانسان ده على خلاف معاه  .....

او مش بنكلم بعض ..... مجرد كلمة مرض بتخلينى ضعيفه

لغاية النهارده المرض هو نقطة ضعفى 

على فكره لو كنت المريضه مش باكون ضعيفه

 زى لو حد غالى عليا هو اللى مريض 

فى اليوم ده سمعت كلام كتير لما كل واحد فى المجموعه

اتكلم عن نقطة ضعفه 

فينا اللى قال اكتر من نقطه

يا ترى يا هل ترى نقطة ضعفك ايه ؟؟؟؟؟ 

Read more...

مش عيب ...

>> الاثنين، 25 مايو، 2015



مش عيب انك تقف تاكل فول من على العربيه

مش عيب انك ترجع البيت بدرى لأن  مامتك بتقلق عليك

مش عيب انك تغير البامبرز لولادك

 ده مش هيقلل من رجولتك 

مش عيب انك تشترى بلوزه من على الرصيف

الخلاصه

عيش فى حالك .... مالكش اى علاقه بكلام الناس


اعمل اللى بيفرحك طالما انه مش حرام 

حط فى دماغك انك احسن من ناس كتييييييييييير

احفظ لسانك ومتشغلش بالك بالقيل والقال

فرح نفسك بنفسك ....... جرب تنسى وتقفل ودانك 

Read more...

تـــــــــــــاج جــــــــديد .........

>> الأحد، 17 مايو، 2015



صباح الفل ..... مسا السعاده

لابد من توجيه الشكر الى قمر التدوين و النسر المهاجر

وكذلك كل من أهدى لى التاج سواء بطريقه ضمنيه او صريحه


فى عام 2009 كنت مسافره دبى لعمل برنامج

وبعد ما بدأت فى تحضير كل الاجراءات

 فجأه الدنيا كلها وقفت والموضوع اتفركش .....

 زعلت جدا جدا بس قولت يلا كله خير 

وقتها اتكلمت مع صديقتى واختى الصغيره لولا

 وقولت لها على فكره المدونه وفى يوم وليله 

عملت المدونه بشكلها واسمها  وكانت البدايه

فى الاول ماكنتش عارفه اكتب اقول ايه

لولا بتحب العمل الاذاعى وصوتها ما شاء الله روعه

وانا كنت باكمل وقتها دراسة كورسات نقد فنى 

وبدأنا نكتب وعملت صداقات ويمكن اقرب الناس لقلبى وعقلى

من عالم التدوين اتقابلنا وضحكنا ودخلنا بيوت بعض 

وتمر الايام وفجاه الفيس يبعدنا عن المدونه

 وفى نهاية السنة اللى فاتت رجعت من تانى 

اتعرفت بناس جديده قمه فى الجمال والرقى 

مدونتى هى صديقتى اللى بتستحمل الهبل او الرغى بتاعى 

التعليقات اهم من التدوينه نفسها

 لانى باشوف ردود فعل المدونين وفى كثير من الاحيان

الردود بتكون اقوى من البوست نفسه 

عمرى ما خجلت انى اكتب عن حاجه تخصنى بالعكس

لا اخجل من كتابة اى شئ لانى بطبعى مش باتكسف اتكلم

او اعبر عن اللى جوه منى ...

بافرح اوى لما اعمل صداقه مع حد من المدونين

حتى لو كانت مجرد صداقه على الورق .......

بالنسبه بقى لموضوع النصيحه خلينى اقولكم 


اللى عند ربنا مش بيرووووح

المفروض اعمل اشاره لمواضيع قديمه

باقى من الزمن ساعه

بحبك ... من اعمال لولا

كفايه رغى كده عن جد فرحانه برجوعى لكم من تانى


ربنا يديم المعروف بنا ونتقابل فى خير وعلى خير

طبعا لازم حد يسألنى ايه موضوع دبى


هابقي احكى لكم في التعليقات

اه صحيح الورد اللي في الصوره  لكم ........





Read more...

إلى ....

>> الأحد، 10 مايو، 2015






حينما اقتربت هى  من عالمه



وجدت الوانه كئيبه ... حزينه 



وحينما اهديت له احدى الوانها  المبهجه 



لم يستوعب انه هكذا بعض البشر



دورهم فى الحياه هو اهداء الالوان المفرحه



الى كل البشر ولا ينتظرون الشكر



تكفيهم نظرات السعاده التى يجدونها



فى عيون الاخرين فى بسماتهم 



واكتشفت ......

ان نظرة عيونه لازالت متعلقه



بذلك الجرح فى رجلها 



 ولم يلتفت الى ما اهديته له !!!!



وحينما ابتعدت عنه كى تواصل دورها فى الحياه


كى تمنح الاخرين الوان مفرحه ... مبهجه 


اكتشف هو فى هذه اللحظه



 انه لم يأخذ منها ما وهبته له



اكتشف انها تهب السعاده بدون مقابل 


كانت حياته سوف تتغير 



هكذا حال بعض البشر 



 لا ينتبه الى ما يفرحه الا بعد فوات الاوان 


البعض لا يتخيل ان هناك من يمنح


الحب ... السعاده ... الفرح بلا مقابل 







Read more...

بنــات قلبى ♥ ♥

>> الأحد، 3 مايو، 2015



من زمان لما اسمع حد بيقول جملة بنت قلبى او ابن عمرى

باتعجب من الجمله واستغرب من مضمونها 

الى ان جربت المعنى العميق للجمله ...

منذ اكثر من خمس سنوات وهبنى الله ساره بنت اخويا

وهى فى نفس الوقت بنت قلبى  ... ساره جت فى وقت 

كنت محتاجه لفرحه بجد لانى كنت خارجه من تجربه قاسيه

وكأن ربنا بيطبطب على قلبى ... بيوهبنى فرحه بجد

مهما حكيت عن تجربتى معاها عمرى ما اقدر انسى

اول مره ناديت عليا ... اول مره حسيت بيا 

دموعها اللى  بتكون متعلقه لما تحس مجرد احساس 

انى تعبانه او متضايقه ... مش قادره انسى لما راحت للدكتوره

تخلع ضرسها وكأنها بتخلع جزء منى

يومها افتكرت اول مره اسنانها تظهر ياااااه 

عشت معاها تجارب ... اول يوم دراسه ...

ازاى اصحابها بقوا اصدقائى سجى وجنى وملك واخيرا يحيى 

وبعد ولادة ساره بحوالى سنتين ونص تطل عليا بنت جديده لقلبى

هنا ... عمرى ما تخيلت ان هنا هيكون لها نفس المكان فى قلبى

هنا او اكاكى زى ما بتحب انى اقولها 

عرفت تاخد لنفسها مكانه فى قلبى ومشاعرى وكيانى


حنيتها عليا غير عاديه .. حبها لحكايتى وقصصى 


سبب انى باحكى عنهم من حوالى شهر تعرضت ساره لوعكه 

صحيه هى الاخطر من نوعها من وجهة نظرى والحمد لله

عديت وقبل ما تتماثل للشفاء تدخل هنا فى وعكه ايضا

التجربيتن كان الفرق بينهم ايام وقتها كان قلبى يبكى 

رغم انى كنت متماسكه امام الجميع بس ربنا كان يعلم بيا 

مافيش حد يعرفنى غير ولازم ولابد يعرف ساره وهنا

اصدقائى المقربين هم اصدقاء لهم 

ربنا يحفظهم ويبارك فيهم ويبعد عنهم كل شر وسوء

واشوف معاهم احداث رائعه وجميله ..........


مهما حكيت عنهم احداث وحكايات هيفضل جوه منى كتير كلام







Read more...

كــذب المنجمون ...

>> الأحد، 26 أبريل، 2015



فى جمله من زمان اتعلمتها بتقول

كذب المنجمون لو صدقوا واحيانا تتقال لو صدفوا

كل واحد فينا عاوز يعرف بكره جاى معاه ايه

خير او شر ... اخبار حلوه او مش تمام 

عشان كده احيانا يلجأ البعض للمنجمين

اللى يفتح الكوتشينه واللى يقرأ الفنجان

ولأن الموضوع تطور شويتين تلاته 

واصبح الموضوع بيتعمل اعلانات ومش عارف مركز مين

وبيعمل ايه ويصلح العلاقات ويرد المطلقات 

حاجه اخر هبل .. اه والله هبل وعبط كمان

 هاحكى  لكم  تجربتى مع الكوتشينه والفنجان 

 من حوالى عشر سنوات او اكتر

اتعلمت  فتح الكوتشينه من احد المعارف

واكتشفت ان الموضوع نصب فى نصب 

لان اللى علمنى قالى انه بينصب على اصحابه ومعارفه

وبدات من اصدقائى وطبعا انا عارفه كل واحد فيهم عاوز ايه

 احلامه وامنياته لبكره واشتغلت على الوتر الحساس

جربت طريقة التأليف والحوار والسيناريو هههههه

وللاسف كانوا بيصدقوا اللى باقوله 

ونفس الهبل اللى عملته مع الكوتشينه عملته فى قراءة الفنجان

امسك الفنجان اطيل النظر فيه 

واللى عاوزه تتجوز اقولها فى عريس

واغنى بقى واقول شوية كلام على نفس الموضوع

الكارثه بقى لما بنت عمى جه لها

 عريس بعد ما قرات لها الفنجان بيومين

والخيبه الكبيره انى قولت لها حد

 من عيلتك جاى ومعاه عريس

وقد كان خالها جاب لها عريس

هنا بدأت بقى تذيع انى باعرف الطالع

وقتها قررت انى اتوقف تماما

خوفت ... اه خوفت لان الموضوع هزار

وفى يوم وليله قررت انى ابطل العبط ده كله 

ولكن ... تيجى لى صديقه تبكى جاى لها عريس

وعاوز تعرف الكوتشينه بتقول ايه ...

يا بنتى حرام ... والله انا كذابه ... مش باعرف

المهم عيطت وانا قلبى ضعيف بقى ...

وفى يومها بعد ما خلصت نزلت اروح مشوار

وبافكر فى اللى حصل وفجأه ...

تطلع لى عربيه نص نقل فوق الرصيف

وتخبطنى فى دراعى ... حسيت انها رساله من ربنا

انى لازم ولابد امتنع عن الحوارات دى

الحمد لله الحادثه مرت بسلام

رجعت البيت رميت الكوتشينه

وامتنعت عن شرب القهوه 

كل الرغى اللى فات معلش 

بس عن جد كان لازم اقوله 

عشان نتعلم ان الموضوع كذب وهبل

وماحدش يجرى ورا الموضوع ده خالص مالص 













Read more...

Free CursorsMyspace LayoutsMyspace Comments

    © بالحب اتجمعنا. Friends Forever Template by Emporium Digital 2009

Back to TOP