عندى كلمه

>> الخميس، 3 مارس، 2011




فى الفتره اللى فاتت كل الناس بتتكلم عن



الثوره ... الفساد ... النظام السابق



مع كامل احترامى لكل من تحدث ويتحدث



عندى كلمه عاوزه اخد رأيكم فيها



الوقت ده مش وقت الاغانى او الشعارات



ده وقت الشغل عشان مصر تقف على رجليها من تانى



كل واحد عنده مطالب عاوز انها



تتحقق دلوقتى قبل كمان شويه !!!



يوم عيد الحب اللى المفروض يوم غير عادى



لبعض التجار زى بائع الزهور



المهم دخلت اسال عن ماريان



البنوته اللى بتشتغل هناك



فوجئت ان صاحب المكان بيقولى



مافيش شغل واضطريت انها تقعد فى البيت



بالله عليكم ماحدش يتريق



ويقولى محل ورد انتى رايقه اوى



لانه باختصار يا جماعه



صاحب محل الورد ده انسان زينا



عنده اسره وبيشتغل معاه



افراد مسئولين عن اسر .....



محلات لعب الاطفال وقفت نشاطها



وفى ناس بدات تسرح العمال اللى عندها



مع العلم ان كل واحد مشى من وظيفته



عنده اسره مسئوله فى رقبته



كتير من الاماكن بدات فى تسريح العمال اللى عندها



يا جماعه محتاجين نبص لمصر شويه



مش نبص لانفسنا وكل واحد يقول يلا نفسى



نفسى افهم ايه السر ان ضباط الشرطه



لغاية دلوقتى مش عاوزين ينزلوا



ياترى هما مش عاوزين الشعب ؟؟؟



او مش عاوزين شغلهم ؟؟



مع كامل احترامى لكل الضباط وعندى اصدقاء منهم



لكن انا مش فاهمه اللى بيحصل لمصلحة مين ؟؟



من كام يوم زوجة اخويا شافت مظاهره فئويه



وقفت وبدات تكلمهم ان اللى بيحصل



ده غلط وانهم بيضروا بمصلحة البلد



ومش هينفع كل حاجه تتحقق لهم فورا



جاء الرد صدمه لها ولى ولكل من سمع تلك الحكايه



رجل فاضل وكبير فى السن من اللى واقفين



فى المظاهرات قالها دى فرصتنا ولازم نستغلها !!!!



ليه فجاه كل الناس حسيت انها كانت مظلومه



ولازم يتحركوا كلهم فى نفس ذات اللحظه



احنا سكتنا كتييييييييييييييييييييير



ياترى لو فضلنا ساكتين شويه كمان



ونحاول نشتغل بجد وكل واحد ينتج فى مكانه



ايه هتكون المشكله ؟؟



الحكومه الحاليه والقادمه



والرئيس القادم وكل الناس اللى فووووووق



عرفت ان شعب مصر مش سهل او ممكن يتضحك عليه



باختصار عرفنا الطريق والطريقه



وماحدش هيقدر يضحك علينا تانى



معلش الكلمه اللى كانت عندى طويله شويه



فى انتظارك كلامكم وتحت امركم



فى النقاش ونتكلم مره او اكتر



بس المهم اننا نشتغل فى نفس وقت الكلام .....




فى انتظار مناقشتكم : زهــــراء

48 التعليقات:

♥نبع الغرام♥♪≈ 3 مارس، 2011 2:03 م  

مساء الخير حبايبى اخباركم ايه يارب تكونو بخير

هقرء وارجع تانى

♥نبع الغرام♥♪≈ 3 مارس، 2011 2:09 م  

للاسف يا زهراء اللى اتكلمتيه عنه دا هو الواقع المريى اللى مصر بتتعايش فيه فى الوقت الحالى
ومحدش عارف نهاية اللى هيحصل دا هيرفع مصر من بعد ما فرحنا بالثورة ولا هتيجى على دماغ الشعب المغلوب على امرة

تسأؤلالالالالالالات كتير
وعلاماااااااااات استفهام تدور بذهنى ومش لاقيه لها اجابه
بجد انا خايفه اوى اوى من اللى جاى
يكفى انى كل يوم بنزل لشغلى وانا حاسه بالخوف من المجهول ومعتش عندى أمان لاى شىء
البلطجيه والحراميه كترو اوى بعد الثورة والشرطه نايمه وخايفه تعمل حاجه

انا تايهه ومش لاقيه اى اجابات لانى مش عارفه ايه اللى ممكن يحصل


بتمنا من ربنا يزيح الغمة عن شعب مصر الحبيب يارب يارب

مدونه ما كفايه بقى 3 مارس، 2011 3:02 م  

انا لحد فتره قصيره كنت ضد كلامك بس بجد فهمت اللى أنتى تقصديه

كنا فاكرين ان بعد الثوره مصر هتقوم على رجليها بس أتضح ان جزء فى مصر بس هو اللى قام وباقى الاجزاء ( حتى اللى كانت واقفه) وقعت على الأرض وبتمد إديها لنا

ربنا يستر

مدونة رحلة حياه 3 مارس، 2011 3:28 م  

السلام عليكم
عارفة مشكلتنا غير الاستغلال وانتهاز الفرص واللى بيهيص فى وسط الزحمة واللى بيخاف لو رجع ميعرفش يطلب تانى واللى بيقول القمع واللى بيقول ما نستحمل ما هى الفلوس اللى اتسرقت هترجع والشعب هيتعوص واللى يقول ما احنا خسرنا كتير منخسر كمان شوية واللى يقول ما هى الثورات لها ضحايا
هو احنا ليه معندناش ثقة فى حد
هو احنا ليه بنتاجر ببعض
هو احنا ليه مش همنا ناس غلابة مش مالكة غير قوت يومها والحمد لله اهو راح منها
هو احنا ليه مش همنا حد مريض مش عارف يجيب تمن علاجه
هو احنا ليه مبنتعلمش نحترم بعض
معلش تعليقى طويل انا اسف
سلام

(ست* جنى* الحسن) 3 مارس، 2011 4:59 م  

سلامو عليكو

عندك حق فى كل كلامك مع انه بسيط بس واقعى
فعلا كان للثورة ضحايا كتير
اكم من شركة خاصة لكن تتعامل مع الحكومة وقفت استيراد خامات للعمل
او صفت لنسبة من العمال بتوعها

ولكن بلاش نبقى ظالمين
الناس كمان ماصدقت
الشباب اللى قامو بالثورة كانو هما راس السهم اللى عداهم وعدى غيرهم
من طريق الظلم واتعلمو على ايديهم ازاى يقولو لا

بس والله الحكاية عايزة شوية صبر
عشان المركب كلها تمشى

والله المستعان

من كل بستان زهرة 3 مارس، 2011 6:22 م  

بصي يا حبيبتي الناس الي بتعمل مظاهرات فئويه دي ناس معذوره وكلمة الراجل الكبير دي كلمه مش صادمه ولا حاجه دي حقيقه
لازم فعلا يستغلوا الفرصه
لازم يضغطوا علشان ياخدوا حقوقهم الي اتحرموا منها بسبب الفساد
ولازم يصروا على مطالبهم لأنه للأسف الضغط بيجيب نتيجه
بيخلي الجيش والحكومه تتحرك بسرعه
وبدل ما ينفذوا الطلبات في اسبوع
لأ يبقوا يومين
علشان بصراحه المسؤليين بيدلعوا
حجتهم ان كل حاجه بتاخد وقت وده مش صحيح هما الي مريحين اوي
الوقت ده عايز سرعه
علشان منخسرش اكتر من كده

الناس دي كانت مقهوره وخايفه
ومصدقت الثوره دي تيجي
كل واحد بيتشجع من الي جنبه

وصاحب محل الورد الي انتي بتقولي عليه ده مسكين وملوش ذنب
بس للأسف ده من الناس الي مكتوب عليها انها تدفع ثمن الحريه والقضاء على الفساد
وفي ناس تاني دفعت ارواحها
في مثال سمعته من شخص
بيقول في سباقات العدو لمسافات طويله
اول ما تبدأ السباق لازم ترجع خطوه للخلف علشان تتقدم بأقصى سرعة للأمام
وهو ده الي حصل
ان في ناس اضطرت ترجع للخلف خطوه بس اكيد المستقبل هيكون احسن
لازم نستحمل شويه
هانت وان شاء الله هتبقى احسن
انا عارفه ومقدره زعلك وخوفك

بس الحريه لاتقدر بثمن

زهــــراء 3 مارس، 2011 6:36 م  

♥نبع الغرام♥♪≈

-------------

انوووووووووس

يا هلا بالقمر
احنا بخير طول ما انتى بخير يا قمرى

زهــــراء 3 مارس، 2011 6:41 م  

♥نبع الغرام♥♪≈

------------

اينااااس

انتى عارفه انى كمان مش عارفه بكره شايل ايه معاه وخايفه من اللى بيحصل واللى لسه هيحصل فى الايام الجايه وياترى مصر هتقدر تستحمل لغاية امتى ؟؟؟

رغم انى كمان زيك باحس ساعات بالخوف لكن بارجع واقول اننا بقينا بنخاف على بعض مش من بعض يعنى فى روح جميله بين الشعب المصرى ياااااااارب تفضل موجوده كده على طوووووووول
البلطجيه طول عمرهم موجودين حتى مع وجود الشرطه كان فى حوادث ويكفى انى اذكرك بحوادث التحرش اللى كانت بتحصل فى وسط البلد وكان ده فى وجود الشرطه بس زى ما تقولى احنا اتعودنا يكون فيه شرطه

بادعو من جوه قلبى ان الجاى يكون افضل واجمل وان كل اللى بنشوفه من ازمات تكون سحابة صيف وتورح لحال سبيلها

تحياتى لكى ودعواتى لكى بالسعاده

زهــــراء 3 مارس، 2011 6:44 م  

مدونه ما كفايه بقى

************

انا كمان لحد فتره قريبه كنت ضد كلامى وكنت فاكره ان مصر هتبقى واقفه على رجليها بسرعه لكن للاسف اللى بيحصل امامى عكس كده خالص مالص

فى الفتره اللى فاتت احتكيت بكتير من الناس فى طوائف مختلفه واعمال مختلفه وقدرت اشوف نماذج بجد ربنا يستر عليهم وعلينا

دعنى ارفع يدى الى الله واضم صوتى الى صوتك
ربنا يستر عليكى يا مصر

زهــــراء 3 مارس، 2011 6:48 م  

مدونة رحلة حياه

---------------

محمد

وعليكم السلام ورحمة الله وبركاته

اولا مافيش اى اعتذار ومش تقول ان اتكلمت كتير لان بجد محتاه انان كلمنا نتكلم ونقول ارائنا لبعض ونحاول نفهم اللى بيحصل ونحلل بطريقتنا اللى جاى هيكون ازاى ....

بالنسبه بقى للاستغلال وانتهاز الفرص حدث ولا حرج وللاسف فى ناس مافيش مخلوق حاسس بها ومالهاش غير اللى خالقها وبس هو اللى حاسس بانسان مريض محتاج علاج او طفل محتاج جراحه عاجله كل الناس دى واحنا معاهم مش لنا غير ربنا وبس

انت عارف ان فى ناس مؤمنه ان الفلوس المسروقه هترجع من تانى وتتوزع علينا ونعيش عيشه فل الفل ناس بتحلم وعايشه فى الخيال ...

للاسف فى كتير مننا مش بيعرف يسمع الاخر ولا يحترمه انا باقول كتير لكن مع ذلك لازال الخير موجود فى الامه ده رسولنا الكريم صلوات الله عليه وسلم هو اللى قال لنا كده

ربنا يستر من بكره ومن اللى جاى بعده

نورت وشرفت

زهــــراء 3 مارس، 2011 6:51 م  

(ست* جنى* الحسن)

----------------

وعليكم السلام ورحمة الله وبركاته

كلامى بسيط لعدة اسباب

اولا لانها طريقتى فى الحوار ان كلامى يكون بسيط

ثانيا الموضوع محتاج انان نتكلم ونتناقش فيه بهدوء وبكل بساطه

كلنا مستعدين نصبر بس الصبر يكون جماعى مش نلاقى فجاه ناس عاوزه زيادة فى مرتبات وحوافز واضافى وبدل طبيعة عمل وبدل وجبات غذائيه وبدل ... وبدل ...
ياريت كلنا نصبر وربنا يسهل من اللى الجاى

شرفتى ونورتى

زهــــراء 3 مارس، 2011 7:00 م  

من كل بستان زهرة

----------------

بصى يا قمر انا عارفه ان الناس دى معذوره لكن ده مش وقته احنا نقول طلباتنا لكن نصبر عشان تحقق وبعدين هو كل الناس فجاه عاوزه مرتباتها تزيد يعنى الموظف اللى فى شركه وكمان اللى فى بنك والمهندس اللى فى شركة بترول كل دول عاوزين يزيدوا فى نفس ذات اللحظه
ياترى كانو ساكتين ليه من الاول مش اتكملوا وطلعوا صوتهم عشان يوصلوه

على فكره المسئولين الكبار ياترى هيقدروا يجيبوا زيادة مرتبات لكل الناس دى من فين وامتى وازاى ياترى نطلب من مطبعة البنك المركزى انها تطبع لنا شوية فلوس او نعمل ايه ؟؟؟
مع كامل احترامى لكل نقطة دم سالت على ارض الوطن ومع كامل احترامى ان كل شهيد هو على راسى من فوق فى ناس لا خرجت فى مظاهرات ولا كان لها اى علاقه باللى بيحصل غير انها بتتفرج ومع ذلك اصابها ضرر ...

فى ناس مش عارفه تشترى شريط برشام لانها اطردت من اعمالها
فى شركات اجنبيه قفلت وسرحت عمالها
الناس دى ياترى مين يصرف عليها ؟؟؟

اعلم ان الحريه لا تقدر بثمن وادعو الله ان يكون الغد افضل

لكن بكل صراحه امامى نماذج كتير حالها وقف وهاقول على مثل لجار لنا كان يعمل فى محل فى شرم الشيخ وللاسف صاحب المحل قال له مافيش شغل الولد طبعا نزل وهو متجوز وبيت واسره وللاسف مافيش فلوس
ياترى يعمل ايه ده مثل من الناس اللى وجعت قلبى بجد

ربنا يستر وباشكرك على نقاشك المحترم

خواطري مع الحياة 3 مارس، 2011 7:36 م  

والله مش عارفة اقولك ايه
مهما كلمتي الناس مابتفهم الكلام ده
في بعقلهم موضوع سيطر
وهو انهم بيحسنوا عيشتهم بالمظاهرات والمطالبات مش عارفين انهم موقفين حال ناس تانيه
ويمكن حالهم هم كمان
بعد مايقع الفأس بالراس بيعرفوا انهم غلطوا وكثروا بالموضوع والمظاهرات
ربنا يسترها عليكم ويرجع مصر زي الاول واحسن
تقبلي مروري ^_^
سلامي لاجمل بنوتين.

وجع البنفسج 3 مارس، 2011 7:47 م  

ربنا معاكم يارب ،، ويعدي هالفترة الصعبة في حياة مصر على خير .. يسعدني التواجد اختي في مدونتكما ..

The illusionist 3 مارس، 2011 8:15 م  

باختصار وبصراحه

الفئه اللى مش محترمه اللى بتطلع فى المظاهرات الفئويه الحاليه انا اجزم انها منزلتش التحرير وان كانت نزلت فيبقى اكيد اكيد مفهموش قصد الثوره

غير ركوب الموجه والذى منه

الفئه اللى بتنزل حاليا

دى الفئه الجبانه اللى كانت بتستخبى فى بيوتها وتقولك مع التيار

مبارك فاز بنحبه

الثوره فازت بنحبها

اللى بينزل حاليا انا بعتبره مخرب

وجبان قوى

انو يستغل فرصه زى دى انو يضرب ويخرب فى اى حته

الناس الجداد اللى ميعرفوش زمان

كانوا بيجيبوا قوالب الصابون السودا ويعملوا منها زيت وصابون مواعين وصابون وش وكل اللى تتخيله

احنا حاليا ربنا كارمنا وعايشين فى نعيم ومش بفضل حد

ده بفضل الله بس

متخربش اللى انت فيه

الواحد لو رجع لورا اكتر من اللى احنا فيه هتبقى كارثه

The illusionist 3 مارس، 2011 8:15 م  

المصيبه بقى فى اللى ماشيين مع الموجه من الشباب

واقسملك بالله فى ناس كتير بتروح متعرفش ليه وازاى وميعرفش هو شفيق وحش ولا حلو

ميعرفش هو ناوى ينيل ايه ولا انت بتاكل امتى وازاى والمعونات والفلوس والمرتبات والمصالح

حالنا مش وحش

بس هيبقى اسود لو الناس فضلت كده

المظاهرات الفئويه دى هتجيب خراب مستعجل

وادى الجامعات الدراسه اتأجلت فيها

تانى لمده اسبوع

ربنا يستر على اللى جاى

وانا مش عارف لحد امتى هنفضل نخترع فى مسميات

اما نشوف المظاهره الجايه هتبقى بمناسبه ايه

على الاقل يستنوا شهر ولا حاجه لحد ما يبان معالم الدنيا

مش اسبوع

هو اللى بيصلح مين يعنى عشان يعمل كل حاجه فى اسابيع

ربنا يستر

mrmr 4 مارس، 2011 12:53 ص  

نفسى بجد الناس تهدى وتبص قدامها وتبطل المظاهرات وكل واحد عايز حاجه يقوم يصرخ ويعمل تجمهر ويكسر ويخرب

النكته بقى اللى ضحكتنى ان الولاد بتوع ثانوى قايمين بمظاهره عايزين يخلو مدرستهم مشتركه ههههه علشان يعاكسوا البنات براحتهم ههههههه
دا حزن تقيل

ربنا يستر من مصير مجهول
بس عشمانه فى ربنا ان يمر الفتره اللى جايه بخير وسلام

تحياتى لاجمل زهراء

MTMA89 4 مارس، 2011 12:54 ص  

للأسف ان الوضع فعلا بقى متأزم..
و مش هتكلم عن الوضع السياسي لأن ده ليه ناسه..
احنا في وقت صعب جدا.. و لازم كلنا نسند و بعض و نتحمل بعض..
لان محدش دلوقتي يخاف علينا غير نفسنا و بس..
انا اللي بجد قاهرني دلوقتي.. ان كل الناس عماله تخوّن بعض.. و ده مش كويس و لازم نخاف من كده
ربنا يصلح حال البلاد و العباد..


تحياتي

محمد
:)

ورقـة وقلم 4 مارس، 2011 2:46 ص  

فعلا حان وقت العمل..ولازم ننتبه لبلدنا الحبيب لازم ننظر للمصلحة العامة اكثر من الخاصة ولازم نأجل مطالبنا الشخصية دلوقت وندي فرصة للحكومة انها تعمل اصلاحات..احنا كده اللي بنهدم مش بنصلح....لكن ما اود الانتباه اليه ان المظاهرات الفئوية هذه يديرها اعداء الدولة بتوع الوطني واذناب النظام السابق لزعزعة استقرار البلد واتمني من الحكومة الجديدة انها تعرف تتعامل معاها بشكل جيد...وان شاء الله القادم افضل

BNT ELISLAM 4 مارس، 2011 3:52 ص  

عندك حق والله ده وقت الشغل
الى بيحب مصر هيعمرمصر
مشنقف ونتفرج
عليها
كل يوم بيفوت حالنا واقف
بندين اكتر وحالنا علىالعام وعلى الخاص بيببقى اسوء
وعلى المستور الفردى
انا معاكى فى كل كلمه



ربنا يستر يارب

SHAPE YOUR LIFE (ABOALI) 4 مارس، 2011 6:46 م  

لكل ثورة اثار جانبية
لابد ان يتأثر بها الجميع
ما نحتاجه اليوم هو حالة تقشف
ومراجعة لكل مظاهر الاحتياج بينا
الكثير من الطعام يهدر لان هناك من لايعرف طريقة حفظه او يفيض عنده وفى النهاية يلقى

ما نشهده اليوم من حالات هى حالات طبيعية
ولكن الانتهازية هى التى تعالت فى اماكن لا يصح ان تطلب مطالب فئوية
فهناك اماكن تطالب بتنازل المدير عن مكانه
والمسئولين وهكذا

لذا لابد لوقف هذا السيل
من كلمات توجه الى المدير ومن يطالب الناس باقالته
وهى ان يعتذر لموظفيه عما سلف ويعدهم ببذل كل المجهود لراحتهم
وهناك كلمة لمن يقوم بالتظاهر من العمال
اتقوا الله فى بلادكم واجعلوا هناك نخبة منكوا تقابل المسئولين وانا على ثقة انهم سيستمعون
فبدل ان نعطل مصالح الناس ثم نشكو
لابد ان نوقظ العقل فينا والحكمة
نعم هناك حقوق
ونعم هناك واجبات
لذا الافراز الطبيعى هو التعقل
واختيار من يمثلنا لكى يقدم مطالبنا
ونحن نعمل

هذا التفكير المنهجى المنظم
يتطلب وجود شخص يلملم شتات هولاء
ويكلمهم بالحكمة واصول الدين
التى نهت عن كل الافعال التى تهدم ولا تصلح


بالتاءكيد نحن مثلك عندنا كلمات
ولكن من نسى رب السماء واللجوء اليه
وطلب منه الطريق الصواب
هو الخاسر بالتاءكيد

خالص تقديرى لهذا الاحساس العالى جدااا
بكل الهموم التى تمر بنا
وحان وقت التعقل لحلها
فبدل ان نشتغل بعض حان وقت الشغل
وبدل ان نتكلم فى الشغل نشتغل افضل

كل التحية على ذلك الموضوع الرائع

جايدا العزيزي 4 مارس، 2011 7:55 م  

صح يا لولا

انا كمان معاك

المفروض نفوق بقى وندور على مصر

انا كمان المطعم عدد البيع فيه نزل كتير

وده بسبب حال البلد

المشكله ان الكل بينضر

والمفروض بعرقوا اننا فهمنا خلاص

مافيش حد تانى هيستعبدنا ويظلمنا

يبقى لازم نشوف حالنا

اسر كتير ضاعت وجاعت

لازم نفزق بقى

الله يفتح عليك

وحشانى

وسامحينى لسه راجعه من شارم

تحياتى

richardCatheart 4 مارس، 2011 8:43 م  

والله يا بطه اتكلمت كتير فى الموضوع دا وانا شايفه انها محاولات غبيه وكان مبارك غار وسب نهر فلوس جاريه هانغرف منها

الصبر ولازم الحياه تستمر والكل يشتغل بس هنا لازم ناكد على نقطتين اولهم الناس دى مالهاش دعوه بالثوره خالص دى مطال فئويه زى ماقولتى تانى نقطه والاهم ان دا مالوش علاقه بستمرار التاظاهر كل جمعه فى التحرير الجمعه اجازه واتقصدت كل جمعه علشان محدش يعطل شغله لان تكتلنا واستمراره هو الضمان الوحيد لتنفيذ مطالب الثوره

زهــــراء 4 مارس، 2011 10:35 م  

خواطري مع الحياة
--------------------
اضم صوتى لصوتك ان المظاهرات دى سبب فى وقف حال ناس تانيه وده مشكله ماحدش حاسس بها وعلى فكره فى بعض الاحيان اشك ان الناس بدات مش تحس ببعضها وكل واحد بيقول يلا نفسى وعن جد الموضوع ده متضايقه منه جدا جدا ....
المفورض بعض رئيس الوزراء الجديد ما راح ميدان التحرير اعتقد ان الموضوع يهدى شويه ونبدا بقى نشتغل قبل ما الوقت يمر ويفوت ونندم وقت مش هيكون فيه ندم

نورتى وشرفتى يا قمرايه

زهــــراء 4 مارس، 2011 10:35 م  

وجع البنفسج
--------------------
نورتى وشرفتى اختى الفاضله
ياااااااااااااااارب الايام تمر بخير وسلام على مصر وعلى كل الوطن العربى

زهــــراء 4 مارس، 2011 10:35 م  

The illusionist
------------------
زنـــــــــــــاتى

على فكره اللى بينزل فى المظاهرات الفئويه ده نظام يلا نفسى يعنى كل واحد عاوز مصلحه خاصه به ومش مهم عنده مصلحة اى حد تانى المهم مرتبه يزيد مش مهم غير حاله هيقف او هيصيبه الضرر او حال البلد كلها يقف او الاقتصاد ينهار وكمان مش بيحمد ربنا انه افضل من غيره لان فى غيره انطر من عمله ولقمة عيشه بح خلااااااااااااااااص

اه يا خوفى من الرجوع للخلف تانى وقانون الغاب يسيطر على المجتمع ويصبح البقاء للاقوى

نورتى يا زنااااااااااتى وعلى الدوام بتشرفنا بتعليقك

شمس النهار 5 مارس، 2011 12:10 ص  

ان شاء الله الدنيا هتروق وتحلي

والحمد لله شفيق مشي

وعندي امل كبير في اللي جاي

وعيزاكي تقري عن الثورات
علشان تعرفي ان اللي بيحصل ده طبيعي جدا
وان ثورتنا اقل الثورات خسائر علي مر التاريخ
وده من رحمة ربنا علينا
ماتخافيش كله هيرجع
وعلي فكرة لولا خفافيش الظلام اللي حركت الناس دي علشان تبث الفوضي في المجتمع ماكانتش حصلت هذه الاعتصامات والوقفات الاحتجاجيه
واللي رد الرد ده
ده مش من عنده خفافيش الظلام علشان تحركهم قالت لهم كده لو مااتحركتوش ولفتوا ليكم النظر ماحدش هيسأل فيكم وهيعتبروكم راضيين
وياريت تقري اللي حصل في المحلة عندي في المدونه في البوست السابق
وان شاء الله مصر محروسه

زهــــراء 5 مارس، 2011 12:15 ص  

The illusionist
-------------------------
زنــــــــــــــــــــاتى

يا مراحب فى تانى تعليق
عارف يا محمد بعد استقالة الفريق احمد شفيق فى ناس كانت بتسال هو كويس او سيئ ؟؟ يعنى مش عارفين اى حاجه فى كل حاجه بس فى نفس ذات اللحظه كانوا بيطالبوا اقالته سبحان الله .. له فى خلقه شئووووووون

موضوع الدراسه الاشاعات اللى سمعتها كتيييييييييييييير لدرجة انى سمعت انهم هيلغلوا التيرم ده والاكتفاء بتجية التيرم اللى فات وطبعا احنا شعب بنعشق الاشاعات والقيل والقال ...

المظاهرات دى بدعه بجد نفسى حد عاقل يقولهم يا جماعه ان البلد مافيهاش فلوووووووووس خالص مالص ونصبر شويه عجلة الانتاج تمشى وكمان الشعب عارف طريقه وعرف ميدان التحرير وازاى نتظاهر نصبر شويه ... مطلوب شوية صبر مش اكتر ...

ربنا يسترها من اللى جاى وادعو الله ان تحمل لنا الايام القادمه خير لكل البشر

اشكرك يا محمد وباتشرف بالنقاش معاك

زهــــراء 5 مارس، 2011 12:15 ص  

mrmr
-------------
مـــــــــــرمـــــــــــر

حبيبة قلبى وحشااااااااااااااااااااااانى

عجبنى اوى ان الولاد اللى عاوزين مدرستهم تكون مشتركه طبعا كل واحد ما بيصدق انه يقول مطلبه ههههههههههههههههههه

عشمى فى ربنا كبييييييييييير زيك يا مرمر وربنا يجيب الخير من عنده

تحياتى وتقدير لاجمل واغلى مرمر

زهــــراء 5 مارس، 2011 12:16 ص  

MTMA89
-------------------
مــــــــــــحمد

انا كمان مش عاوز اتكلم عن الوضع السياسى او اى اوضاع ..

كل اللى يهمنى حال الناس اللى بجد فى ناس حالهم يصعب على الكافر واحنا مش كفره ... يا جماعه كلنا نعرف ربنا ولازم بجد كلنا نساعد بعض نقف مع بعض ونخاف على بعض وربنا يسترها من عنده

حكاية بقى ان كل الناس بتخون بعض دى الكارثه فى حد ذاتها وربنا يسترها ويصلح حال البلاد والعباد يااااااااااااااااااارب

زهــــراء 5 مارس، 2011 12:17 ص  

ورقـة وقلم
------------------
اتمنى ان كل واحد يعمل للمصلحه العامه وبلاش ان كل واحد يفكر فى نفسه وحاله
وياريت نفكر فى بلدنا عشان تقف من تانى ونقدر نعدى بها لبر الامان ..
اتمنى اننا ندى فرصه للحكومه انها تشتغل ونشوف نتيجة عملها ونقدر بعدها نحكم على عملها واذا مش عجبنا عمل الحكومه احنا خلاص عرفنا الطريق ونقدر نتظاهر من تانى ونحدد مطالبنا لكن للاسف وجه الاستعجال اللى احنا فيه صعب اوى ......

ادعو الله ان يكون القادم افضل واجمل

شرفتى ونورتى

زهــــراء 5 مارس، 2011 12:18 ص  

BNT ELISLAM
-------------

بنت الاسلام ...
فعلا ده وقت الشغل ومش عاوزين شعارات واغانى وكلمات رنانه
عاوزين نرجع نشتغل من تانى ونزود كمان اشغالنا وطاقتنا الايجابيه
اشكرك على موافقتك لرايى
نورتى وشرفتى

زهــــراء 5 مارس، 2011 12:21 ص  

SHAPE YOUR LIFE (ABOALI)
-----------------------
أبـــــــــو على

لكل ثوره اثار سلبيه وايجابيه معاك فى الكلام ده بس المشكله ان الاثار السلبيه زادت اوى واعتقد اننا نسينا كل الاثار الايجابيه اللى حصلنا عليها من خلال الثوره ....

ما نحتاجه اليوم هو حالة ترتيب لكل الاوراق ...
ترتيب داخلى للنفوس البشريه ...
ترتيب لحالنا وحال الاخرين الذين اصابهم ضرر من تلك الاثار السلبيه ...
لكن ما نحيا فه الان هو نوع من الفوضى فى كل شئ ...
الانتهازيه صح هى فعلا دى الكلمه المناسبه اللى تعبر عن الكثير والكثير من الاشياء التى نحيا فيها فى تلك الايام بصراحه فى طلبات ما انزل الله بها من سلطان كل اللى عاوز حاجه ينزل يعمل مظاهره اللى عاوز يشيل مديره , واللى عاوز زيادة مرتب , واللى عاوز علاوه , واللى عاوز تثبيت فى وظيفه , واللى عاوز ... , واللى عاوز ..... يا الهى نفسى افهم الحاجات دى هتحقق بعصا سحريه ده حتى يقال ما يقدر على القدره غير ربنا طيب يا جماعة نصبر مش محتاجين اكتر من شوية صبر واعتقد اننا اتعلمنا الصبر فى السنوات الماضيه .....
سيدى .. المشكله هى الصوت العالى والضوضاء التى اصبحت صفه اساسيه لكثير من بنى البشر واصبح كل من له مطلب يتحدث بصوت مرتفع ويطلب ويطلب ..... وهناك الكثير قاموا بتعطيل عقولهم واعطوا لها اجازات مفتوحه واصبحوا لا يفكروا فى الواجب اللى علينا كل واحد بيقول يلا نفسى وعاوز حقى , انا لست ضد ان كل واحد ياخد حقوقه لكن لما نقدم اللى علينا يبقى نطالب بحقوقنا .........
ما اشاهده الان لم يكن له دليل فى اى دين سواء اسلامى او مسيحى او حتى يهودى او اى ديانه سماويه بالفعل ما يحدث لنا هو نتاج لبعدنا عن الخالق " نسوا الله فانساهم انفسهم "

كل الدعوات الصادقه على كلماتك الاكتر من رائعه

زهــــراء 5 مارس، 2011 12:22 ص  

جايدا العزيزي
------------
اولا حمد لله على السلامه
انا عارفه ان الحال فى شرم واقف خالص مالص والسياحه طبعا بح خلاااااااااص
ان شاء الله الايام دى تمر وتعدى على خير وترجع العجله تدور من تانى والسياحه تنتعش من تانى
ياريت نفوق وندور فعلا على مصلحة مصر وبلاش جملة يلا نفسى دى
حاجه صغيره خالص مالص بس انى زهراء مش لولا ....
طبعا احنا اصدقاء لولا وانا بس حبيت اقول اننا اتنين وللاسف لغاية دلوقتى فى ناس فاكره اننا شخص واحد
شرفتى ونورتى يا قمر

زهــــراء 5 مارس، 2011 12:24 ص  

richardCatheart
----------------------
مــــــــــــارووووو

اضم صوتى الى صوتك ان اللى فى المظاهرات الفئويه مش لهم ادنى علاقه بالثوره
بس نفسى نصبر لان بجد البلد خلااااااااااااص بح مش فى فلوس ومافيش نهر نغرف منه وندى لكل اللى بيطلب شوية فلوووووووس ...

فى ناس تعبت من الكلام لكن لسه عندى امل ونفس طويل ان فى ناس تسمع الكلام وتطبقه ونبدا بقى كل واحد ينتبه لحال البلد شويه وبلاش نظام يلا نفسى

نورتى يا مارو يا قمر

زهــــراء 5 مارس، 2011 12:29 ص  

شمس النهار

--------------

شمس الشمووووووس يا شمووووسه

يااااااااارب تروق وتحلى وتبقى مصر بلد الامان والامن والخير ياااااااااارب

كل اما قراته عن الثورات كان مجرد قراءات ولكن ما اشاهده هذه الايام هو واقع احيا فيه وبصراحه حال ناس كتير بيصعب عليا اوى وباشعر بالعجز وانى واقفه مش قارده اعمل لهم اى حاجه

رغم انى من اكتر الناس تفائل لكن بصراحه مرعوبه من طابور البطاله اللى بدا فى الزياده والمشكله ان فى ناس قعدت من اشغالها وه لها اسر وفى رقبتها مسئوليات

يارب الجاى يبقى افضل ونقدر نقف من تانى ونكون فى موقف قوه المره دى

نورتى وشرفتى

الازهرى 5 مارس، 2011 1:10 ص  

ما تخافيش
احنا لسه فى البداية المتقدمة من الأوضاع
إنما لو الأمور مشيت بنفس المعدل
بإذن الله بكره هيبقى أحسن بكتييييييييييير من كل اللى احنا متخيلينه

تحياتى دوما

Butterfly 5 مارس، 2011 3:19 م  

انا متفقه معاكى
فعلا الناس لازم تشتغل على نفسها بقى وكفايه كده ندى فرصه للحكومه الجديده انها تشتغل هى كمان ويا تثبت حسن نيتها يا العكس وساعتها نبقى نتحرك تانى ومفيش حاجه ساعتها هتمنعنا

اسيره الاحزان 5 مارس، 2011 11:27 م  

احنا عملنا زى اللى حضر عفريت ومش عارف يصرفه ... الناس محوشه كميه لااااا اللى كان المفروض تتقال فى ال30 سنه اللى فاتت عشان تطلع تقولها كام يوم

لكى الله يا مصر :((((((

تحياتى

Ms Venus 7 مارس، 2011 1:16 ص  

معاكى حق يا زهراء

مش هزود اى كلام على اللى كتبتيه

ومتفقة معاكى


ربنا يستر على مصر

زهــــراء 7 مارس، 2011 7:00 م  

الازهرى
------

بصراحه عاجبنى اوى جملة ماتخافيش

ادعو الله ان يكون بكره افضل من النهارده وامبارح كمان
نفسى بجد بكره يكون افضل من اللى فى خيالى

شرفت ونورت ويارب كل امنياتك تكون حقيقه عما قريب ..

زهــــراء 7 مارس، 2011 7:01 م  

Butterfly
--------------
اتمنى ان كل واحد يشوف شغله ويحاول ينتج فى عمله وكفايه وقت كتيييييييير ضاع من غير اى فايده ويااااااااريت نصبر علىا لحكومه الجديده شويه وشنوف الاحوال هتكون ايه ويااااارب يبعت لنا الخير يااااااااااااااااارب

وفى حالة اذا الحكومه الجديده اخفقت لا قدر الله احان عرفنا المكان والطريقه وعارفين نعمل ايه

دمتى بكل خير

زهــــراء 7 مارس، 2011 7:05 م  

اسيره الاحزان

---------------
فعلا لكى الله يا مصر
كل اللى كان المفروض يتعمل فى السنوات اللى فاتت عاوزين نقوله فى ايام قليله
عجبنى اوى مثل اللى حضر العفريت ومش عارف يصرفه


امنياتى بالتوفيق

زهــــراء 7 مارس، 2011 7:07 م  

Ms Venus

--------------

ارق فينوس

ربنا يجعل القادم اجمل وافضل

موناليزا 8 مارس، 2011 4:04 ص  

الناس بتتظاهر لان عندها كبت سنين طويلة وماصدقت فعلا تلاقى فرصة تنفس عن غضبها وقهرها وبغض النظر عن اى حاجة هما حاسين انهم لو مااتكلموش دلؤتى محدش هيسمعهم بعد كده وهيندموا ان كان فيه فرصة وهما ما استغلوهاش

مش ذنبهم ده ذنب قهر وذل وكبت سنين طويلة

أما عن تسريح العمالة وغيرها فأنا واثقة فى الله بأنها مرحلة مؤقتة وهتعدى اكيد بسرعة


Free CursorsMyspace LayoutsMyspace Comments

    © بالحب اتجمعنا. Friends Forever Template by Emporium Digital 2009

Back to TOP