ألبــوم صــــــــور
>> السبت، 25 يونيو 2011
من كام يوم قررت اعمل حملة تنظيم وترتيب لبعض متعلقاتى
وده شئ بايخ اوى لانى فى كل مره اليوم يضيع
وانا قاعده اتفرج على حاجاتى ومحتاجتى القديمه
المهم لاقيت فى احد الادراج ألبوم صورى
يعنى لاقيت اول صوره ليا وانا طفله كان عمرى 45 يوم فقط
وكمان صورتى فى عيد ميلادى الاول
ومجموعة صور حلوه اوى اللى منها فى رحلات
او مناسبات سواء عائليه او مناسبات مع اصدقائى
قلت ياترى يا هل ترى
كل واحد فينا لو بحث فى ألبوم الصور الخاص به
ياترى ممكن يلاقى فيه ايه
اكيد لازم هيلاقى ذكريات من زمن فات
يمكن يلاقى ناس الدنيا بعدتنا عنهم
ويمكن يلاقى كمان اماكن زارها وهو طفل
يلا بقى كل واحد يفتح البوم الصور
ويحكى ايه الصور اللى شافها
بس بكل صراحه فى انتظار اسمع الذكريات
تفتح البوم الصور معكم : زهــــــــــراء
28 التعليقات:
جميلة جدا الذكريات والصور بتعتها بتخليني نحس بطفولتنا المميزة
طبعا الموضوع ده جميل لكن لم اعد احب هذا بسبب وجود بعض الشخصيات التى رحلت او اصابها المرض و تغيرت ملامحها و قدراتها
هذا على المستوى العائلى
اما على مستوى الاصدقاء فاترحم على الايام الخوالى بدون مسئولية
تحياتى
جميلة الذكريات والبوم الصور بيضم جواه حياة عشناها وانفعلنا بيها
لما بافتح البوماتي ايام الدراسة والاقي صور مع اصحابي بابقى فاكر دي امتى وكانت فين و مين صورها وافتكر كل الاحداث اللي في الفترة دي وقتها باحس ان انا عايش
تحياتي
دايما بفتح البوم صور ثانوي
كنا مجموعة لطيفة جداااااا
وللأسف مش علي اتصال ببعض غير انا وانتمتي للنهارده
ومره كنت في مول مع بناتي ولاقيت صديقة منهم مع بنتها
مش ممكن فرجنا علينا المول من كتر اللي عملناه
:)))
عموما الذكريات الحلوة حلوة
أظنكِ وضعت يدك على جرح...
كثيرا ما كنت ألجأ إلى ألبوم الصور لكي أتأمل صوري في الماضي وصور اصدقائي، وكيف تبدل الزمن وتغيرت الأوضاع والظروف.. شيء يبعث في نفسي قليلا من الحنين ممزوج بالاستغراب من تصاريف الزمان.
حياكِ الله اختي زهراء.
البوماتى وصورى مش بتفارقنى ابدا لانها بتفكرنى ذكريات نفسى ترجع تانى ولان ده مستحيل الصور هى اللى بتخلينى اعيش معاها دايما
الصور هى لقطات حية داخل الواجدان كانت فى يوم من الايام وكنا نحن عبير تلك الايام
ببسمات ما و ضحكات ما وافعال ما
حملت تلك الصور عمق تعابير قطار العمر
عند عمل الفلاش باك مرة ثانية
لاستعادة بعض مما كان او رؤية ظل من الظلال على حدث ما او كان وكان وكان
الصور تثير فينا بالتاكيد اسقاطات على مراحل
كانت تحمل لنا ذكرى قد تكون قمرية العنوان او شمسية الضياء
حين نرى الصورة تحدث تنهودات واهات
وعلامات مرسومة على الوجه تحفر لنفسها خريطة سنون كانت مثل موج البحر الذى خط فى الصخر ملامحه ومراسمه
عندما ارى البوم صورى
اقول انها حياة انسان مرسومة هناك من فى الصورة بالتاءكيد وجودهم فيها له معنى وحكمة
واظل ادقق واتاءمل من هم فى الصورة واقول لعلهم كانوا
صدفة تذكرة صداقة مشاغبة تطفل اخوة زمالة حب
جغرافيا مكان تلاقت فيه ارواح او مساندة او هداية
ام ام ام ام
ثم اقول
انها الحياه وضعت لنا خطوط البداية
واتمنى ان نترك الالبوم ليكون لغيرنا هداية
دائما مواضوعاتك محل تقدير واحترام واستثارة لما فى نفوسنا من معانى وفكر
وهبك الله الحياة الاسعد التى تستحقين
والبوم نجاااااااااح به تفتخرين
تقديرى
كلنا بنعمل الحركه دى كل فتره
انا مثلا عندى صور وانا لسه مولوده وصور أكبر وصور لأعياد ميلاد فى سنسن مختلفه وصور لرحلات المدرسه
يااااااااااااه رجعتينا لزمن حلو صور في المدرسة والجامعة وقبلهم واهلنا وحبايبنا اللى موجود منهم واللى مش موجود حاجة جميلة فعلا ان الواحد يراجع صوره كل فترة
انا كده يا حبيبتى رغم انى عمرى 32 سنه مازالت احتفظ بذكريات طفولتى وجميع مراحلها
دمتى ودام الاحساس الجميل
تحياتى
ايناس
انا زيك كده
برضه كل ما أنوى
ارتب صورى أقعد اتفرج
عليها ويضيع اليوم سدددى
المهم الصور اللى فاكرها اوى
صورة وانا على البلاج كنت يمكن
عندى 5سنين وفاتحة بردون (بقى)
360 درجة من الانبساط:)على ايه
انا طبعا مش فاكره لـكن اهى
صورة بتثبت انى كنت(....)
فى وقت من الأوقات:):):)
كريمة سندي
*************
الذكريات بكل تاكيد جميله
شرفتى ونورتى
ابراهيم رزق
**************
يااااااااااااااه معقول البوم الصور بتاعك بيخليك كده
بكل تاكيد عشت فيه اوقات جميله من الكثير من البشر يجوز تكون تغيرت الملامح لبعضهم بسبب السن او المرض لا قدر الله ولكن جمال هذه الذكريات تجعلنا نتبسم كلما مر امامنا هذه الصور التى تحمل جزء مننا لان هذه الذكريات هى جزء مهم منا ....
كل التقدير على تشريفك لنا
مصطفى سيف
***********
الله على ذكرياتك لما تفتكرها بكل تفاصيلها دى من نعم ربنا سبحانه وتعالى على بعض البشر انهم يتذكروا كل التفاصيل
دعواتى لك بالسعاده على الدوام
شمس النهار
**********
ست الكل شمس الشموووووووووس
بصراحه لما قرات الكومنت تخيلت المشهد فى المول وتبسمت من رد فعل كل منكم
اذا الذكريات جميله وحلوه فانى ادعو الله لكى ان يكون القادم اجمل وافضل
دعواتى لكى بكل الحب والخير والسعاده
أبو حسام الدين
**********
استاذ رشـــــــيد
ليه بس وضعت ايدى على جرح كده اول جمله فى الكومنت خضتنى :-o
البعض منا يلجأ الى الصور لكى يترحم على ايام فى الماضى واشخاص رحلوا سواء رحيل فعلى او بفعل الظروف والوقت ولكن لابد ان نسترجع هذه الذكريات وعلى الوجوه بسمه لاننا عشان فترات من عمرنا جميله وروعه وكلما جالت بخاطرنا تلك الذكريات لابد ان نبتسم لها ...
كل التحيه والتقدير لشخصيه محترمه ...
Noha Saleh
---------
نـــــــــــهى
جميل منك ان البوم صورك مش بيفارقك وكل واحد فينا بيحاول يسترجع ذكرياته مع الصور لان فيها شخصيات وصور واحداث ....
دعواتى لكى بالسعاده
SHAPE YOUR LIFE (ABOALI)
*************--------
ابــــــــــو على
قرات الكومنت اكتر من مره وفى كل مره اخد القرار انى اضيفه الى البوست لانه يحتوى معانى جميله اوى وطبعا ده شئ مش غريب عليك ابدا ابدا لانك بالفعل فى كل مره تشرفنا بكتابة كومنت اكتشف انك تعمقت فى المعنى وقرات ما بين السطور حتى لو اشياء غير واضحه وكنت افكر فيها فقط ....
الصور تثير فينا ذكريات من زمن عدى وخلاص فات , نتذكر تلك البسمات مع شخصيات قد تكون اقارب او من العيله او عابر سبيل , لما نشوف صورنا زمان قد ترتسم بسمه على الشفاه مصحوبه بدموع فى العيون فى بعض الاحيان ....
بالفعل سيدى الفاضل اى البوم صور ما هو غير حياة انسان وكلنا انسان !!!
توقفت مره اخرى امام دعواتك الرائعه فى نهاية التعليق ورددت معها امين .. امين
وهبك الله كل الخير والسعاده والرضا من الرحمن
كل التقدير لانسان عن جد قدير
Butterfly
**--*-******
كلنا بنعمل الحركه دى كل فتره لاننا فىا لنهايه كلنا انسان نتشابه فى الكثير والكثير من الصفات
جميله ذكريات الصور والاجمل هو تشريفك لنا على الدوام
خالتى بمبة
**********
اول احب انى اسجل اعجابى بالنيك نيم بتاعك اوى لانه بصراحه فكرنى بزمن جميل لما كنت اسمع الاذاعه قبل ما انزل اروح المدرسه واسمع برنامج الى ربات البيوت وشخصيى خالتى بمبه كانت عسوووووووله اوى اوى ^_^
جميل اننا نراجع البوم الصور ولكن الاجمل اننا نراجع ذكريات جميله مع ناس جميله ربما تكون اختفت من حياتنا لأى سبب
دعواتى لكى بالسعاده وان شاء الله تتكرر الزيارات وتشرفينا
♥نبع الغرام♥♪≈
**************
اينـــــــــــاس
على فكره مش مهم الانسان يكون عنده كام سنه لكن الاهم انه يكون له ذكريات من زمن فات يحتفظ بها فى البومه الخاص به
كل العمر الجميل لكى يا انوس
norahaty
*************
نـــــــــورا
الاول بس عاوزه اعرف ايه اللى بين الاقواس ؟؟؟
اجمل حاجه ان صورتك كانت على البحر واكيد هنا فى اسكندريه ^_^
شوفتى بقى البحر بيخليكى تنبسطى وبدون بردوووون يا قمرى
دعواتى لكى بالسعاده والحب والخير على الدوااااااااااام
فكرة حلوة
كنت بعملها زمان
دايماً بفتح صور أصحابى فى الكليه وفيديوهاتنا
بضحك كتيييييير اوى كل ماافتكر كل واحده كانت عامله ازاى وبتقول ايه ساعتها
وفكرة كل صوره مين اخترعها .. كنت دايما بميل للصور المجنونه الملخبطه ودايما كنت احاول افتكس حاجات من هذا القبيل
بس عارفه دلوقتى مش عايزه اقرب للصور دى
لأنى عارفه انى بعد ااتفرج هزعل ...
لانى مفتقداهم :( :(
احلى حاجة في الصور لما باشوف ولادي وهم صغيرين وباقول ياريتهم فضلوا صغيرين على طول عشان وقتها كانوا جنبي وكانت الدنيا لسة مالعبتش معانا لعبة الفراق والبعد ..لكن ارجع واقول المهم اتطمن عليهم حيثما كانوا والحمد لله ..تحياتي
موناليزا
*************
يا هلا يا هلا
الاحلى من الفكره نفسها هو تواجدك هنا
دعاء العطار
-------------
مشاعرك بانت من حروفك وكلماتك يا دودو
بس مش لازم تزعلى لانك لما تتفرجى على الصور دى اكيد تفتكرى ذكريات جميله من زمن عدى وفات
ربنا يجعل ايامك القادمه كلها خير وافراح
zizi
***********
لما قرات التعليق بتاع حضرتك تذكرت جمله قالتها احدى قريباتى قالت كان نفسى اولادى يفضلوا صغيرين ضحكت وقولت لها على اسا انهم كانوا ملايكه يعنى قالت لا على الاقل كنت بانام لما هما كل واحد يدخل حجرته وكمان اسال انت رايح فين دلوقتى لما باتصل على موبايل حد فيهم ممكن مش يرد عليا ويبدا القلق
ربنا يبارك لكى فى اولادك واحبابك يااااااااارب
كل التحيه والتقدير لتواجدك
إرسال تعليق