حكـــايــات بنـــــات " الجزء الاول "

لما حصل الطلاق بينا كنت فاكره انها نهاية الكون ...

 وكل شويه اتخيل ازاى ابننا هيتربى بعيد عن ابوه

وكأنه يتيم وفجأه ..... 

اكتشفت انى لما خسرته كزوج كسبته كصديق ... اهلى واهله 

مش قادرين يصدقوا اننا انفصلنا .... لاول مره احكى معاه بكل 

حريه ... اخد رأيه فى كل تفصيله فى حياتى ... وهو كمان

 بيحكى معايا كل كبيره وصغيره فى حياته ....

فى رجاله كده مش تنفع تكون ازواج ... لانهم مش بيعرفوا 

يشيلوا مسئولية نفسهم ... ازاى يقدروا يشيلوا مسئولية حد 

تانى  ......

ازاى كنت خايفه من الحب  ؟؟!!!! ....

 اجمل ايام حياتى عشتها معاه ولسه عايشه فيها ....

 شكلى اتغير .... صوتى ... كل حاجه فيا اتغيرت

 وكأنى بقيت انسان تانى .... بيكمل كل كلامى ....

 قبل ما اطلب منه الحاجه بيحققها ....

 فاهم دماغى وعارف يحتوى افكارى ....

 ساعات باحس انه اتربى معايا ...

 نفس الافكار اللى مؤمنه بها ....

 نفس الكلام اللى باقوله ....

 توائمى اللى كان تايه منى ♥♥



يلا ... عيشه والسلام .... ما اقدرش اطلب الطلاق

  اعمل ايه فى العيال ؟؟؟

 امى على طول تقول مافيش واحده فى عيلتنا اتطلقت

 وجوده فى البيت زى عدمه .... محسسنى انه عايش فى فندق

 لما ابننا تعب والدكتور قال لازم نعمل له عملية اللوز

 هو ولا حس اننا مش فى البيت ...

 لما عاتبته قالى كنت فاكر انك عند امك بايته يومين ...

نفسى اصرخ واقول انى باحبه ....هو مش حاسس بيا ....

 ليه بيعاملنى كده ؟!!.... بيخاف عليا من الهوا الطاير ...

 كل شويه يتصل بيا يطمن عليا ......

 مش بيعرف ياخد اى قرار فى حياته من غير ما يرجع لى ....

 بيحكى تفاصيل حياته ومشاكله ....

 لما يقع فى مشكله يجرى عليا عشان ياخد رأيى ....

 باحبه اوى ... مش فاهمه هو عاوز ايه ...

هو ينفع اقوله انى باحبه ؟؟؟.... 

ليه البنت لازم تستنى ان الرجل يعترف الاول ؟؟؟ 

دى شوية حكايات لبعض البنات سمعتها

بعضهم عاشرتهم والبعض سمعت عنهم

لسه فى حكايات بنات كتيييييييييير

انتظروا الجزء التانى عما قريب ان شاء الله

زهــــــــــراء