رجـــــال أقــوال

>> الأحد، 15 سبتمبر، 2013






لسه باحبها ... وفاكر كل حاجه حلوه معاها عشتها

 ولا ينفع افكر غير فيها 

 عارف انها فارقت الحياه بس لسه حاسس انها معايا 

 عايشه فى قلبى وجوه كيانى ...

 كل لما اتفرج على صورنا ابتسم والدموع بتغسل وشى 

 عارف ان المشاعر دى نسائيه...

 لكن اللى جوه فى قلبى مشاعر انسانيه

 لاغلى انسانه شافتها عنيا ...

 احن واحده فى الدنيا كانت عليا

 عمرى ما هاقدر انساها ♥

/********************

 فجأه ومش عارف ازاى لاقيت نفسى باحبها ...

 حكيت لها عن كل حاجه ...

 احلامى ... طفولتى ... عيلتى ...

 حسيت انى شبه شوال الدقيق المدلوق ...

 كل حاجه قولتها ماعدا ... انى خاطب ..

 ولما عرفت لاقيتها بتعاملنى بنفس الاهتمام

 والحب والمشاعر الصادقه ...

 لأننى انانى او هى بتقول على الرجل الشرقى انانى ..

 كنت فرحان انها فى حياتى ..

 باتعلم منها.. بتكملنى فى كل حاجه ..

وبتسمع كلامى فى كل حاجه رغم شخصيتها القويه ...

 اتغيرت فى حاجات كتير عشان خاطرها ...

 كان لازم اتمم زيجتى ..

 قررت انى انسحب وابقى ندل ... 

 كان لازم اكون بعيد ومن غير مقدمات او كلام ...

 عشان هى تقدر تواصل حياتها من غيرى ...

 انسحبت ...


***********


من اول مره شوفتها فتحت لى قلبها ...

 رغم انى كنت مستغرب منها ومن كلامها ورد فعلها

  لكن جوايا حاجه كانت بتحب تسمع منها ...

لا عرفت اقفل باب قلبها اللى اتفتح

 ولا عرفت ادخل جوه منه واستقر فيه ...

 ويمر الوقت ومشاعرى واقفه محلك سر ...

 لا عارف اتقدم واقرب منها ولا عارف ابعد عنها ...

*****************



باحبها ...

 بس خايف اقرب منها واقولها ... 

صديقتى الرائعه ... اجمل انسانه القدر وهبها لى

 حاسس انها برضه بتحبنى ...

 كل كلمه بتقولها بتحمل معانى كتيييييييير ....

 اهتمامها بيا ...

 سؤالها عن اسرتى او عليا 

خايف وقلقان اخد اول خطوه وارجع منها ندمان ...

 حاسس انها فاهمه ... بس.....

 مش عارف ألمح ليها او اصرح ليها ...

 لو رفضتنى صعب الاقى زيها واحده تانيه ...

 خايف افقدها كصديقه فى حياتى ...

 خلينا كده بنتفرج على بعض ...

 مش يمكن يجى يوم وهى اللى تصرح ليا ....

 يمكن ....







بعض من اقوال الرجال 

ربما سمعت من بعضهم والباقى اعرفهم وعاشرتهم


انتظروا الجزء التانى عما قريب

نقلت لكم الاقوال : زهـــــراء

14 التعليقات:

hams ali 15 سبتمبر، 2013 7:12 م  

بس هما الرجالة ليه بيعملوا كده .... ليه مش يحافظ ع حبه و اذا انت من الاول ناوى تبعد يبقى ليه توجع قلب واحدة معاك ... ايه فايدة كل المشاعر دى اذا كانت ف الاخر (( مشاعر فراق ))

محمد التركى 16 سبتمبر، 2013 8:46 م  

السلام عليكم فطومه

الله الله الله بجد شوقتينى للجزء التانى ايه الفضايح دى يابطه بس ههههه
رائعه طول عمرك
بس بجد قصص حقيقيه وواقعيه فعلا حياتنا فيها كتير والله الراجل غلبان قوى لما بيحب بيبقى اغلب من الغلب
هاااااا ياله دنيا وكلنا لها

تسلم الايادى يافطومه ومستنى الجزء التانى بشغف كبيييييييير يمكن الاقى حكايتى فيه هههههه

مع تحياتى
محمد التركى

شمس النهار 18 سبتمبر، 2013 8:24 ص  

شوفي الرجل لما يعوز حاجة يسخر اي شئ ويحلل اي شئ علشان ياخده
نادرا ماتلاقي حد صادق مع نفسه ميه ميه
هو خاطب ولازم يتم زواجه بيقرب من واحدة تانيه ليه؟؟؟

التدوينة رائعة
بس كانت عايزة كل واحدة تبقا لوحدها علشان نعرف نندد ونشجب براحتنا :))

زهــــراء 28 سبتمبر، 2013 8:07 م  

hams ali

*****

مش كل الرجاله بيعملوا كده يا هموس فى رجاله فله شمعه منوره وفى رجال عن حق وفى اشباه رجال وهكذا الحياه

منورانى يا قمرى ♥

زهــــراء 28 سبتمبر، 2013 8:10 م  

محمد التركى
*-*-*-**

وعليكم السلام ورحمة الله وبركاته ...

والله يا تركى هى حكايات من واقع الحياه وحكياتا قلوب كانت بتحكى عشان نقلتها لكم بأمانه وصلت الى قلوبكم واطمن مافيش فضايح هههههههه وحكايتك مش محتاجه انها تتكتب هى بتتحس وبس

انتظر باقى الاجزءا ان شاء الله عما قريب

زهــــراء 28 سبتمبر، 2013 8:14 م  

شمس النهار ...

ست الكل شمس الشمووووس

كما ان هناك نساء صادقات مع انفسهن كذلك بعض الرجال وهنلاقى فى الحياه على كل لون وشكل وطبع هى الحياه يا صديقتى الطيبووووووبه
بالنسبه للشخص اللى خاطب وقرب من واحده تانيه اقوات مش بيكون لنا القدره فى السيطره على مشاعرنا او قلوبنا ده مش دفاع عنه بقدر ما هو وجهة نظر بعض البشر

تواجدك بيشرفنا وينورنا


Free CursorsMyspace LayoutsMyspace Comments

    © بالحب اتجمعنا. Friends Forever Template by Emporium Digital 2009

Back to TOP