كــذب المنجمون ...

فى جمله من زمان اتعلمتها بتقول

كذب المنجمون لو صدقوا واحيانا تتقال لو صدفوا

كل واحد فينا عاوز يعرف بكره جاى معاه ايه

خير او شر ... اخبار حلوه او مش تمام 

عشان كده احيانا يلجأ البعض للمنجمين

اللى يفتح الكوتشينه واللى يقرأ الفنجان

ولأن الموضوع تطور شويتين تلاته 

واصبح الموضوع بيتعمل اعلانات ومش عارف مركز مين

وبيعمل ايه ويصلح العلاقات ويرد المطلقات 

حاجه اخر هبل .. اه والله هبل وعبط كمان

 هاحكى  لكم  تجربتى مع الكوتشينه والفنجان 

 من حوالى عشر سنوات او اكتر

اتعلمت  فتح الكوتشينه من احد المعارف

واكتشفت ان الموضوع نصب فى نصب 

لان اللى علمنى قالى انه بينصب على اصحابه ومعارفه

وبدات من اصدقائى وطبعا انا عارفه كل واحد فيهم عاوز ايه

 احلامه وامنياته لبكره واشتغلت على الوتر الحساس

جربت طريقة التأليف والحوار والسيناريو هههههه

وللاسف كانوا بيصدقوا اللى باقوله 

ونفس الهبل اللى عملته مع الكوتشينه عملته فى قراءة الفنجان

امسك الفنجان اطيل النظر فيه 

واللى عاوزه تتجوز اقولها فى عريس

واغنى بقى واقول شوية كلام على نفس الموضوع

الكارثه بقى لما بنت عمى جه لها

 عريس بعد ما قرات لها الفنجان بيومين

والخيبه الكبيره انى قولت لها حد

 من عيلتك جاى ومعاه عريس

وقد كان خالها جاب لها عريس

هنا بدأت بقى تذيع انى باعرف الطالع

وقتها قررت انى اتوقف تماما

خوفت ... اه خوفت لان الموضوع هزار

وفى يوم وليله قررت انى ابطل العبط ده كله 

ولكن ... تيجى لى صديقه تبكى جاى لها عريس

وعاوز تعرف الكوتشينه بتقول ايه ...

يا بنتى حرام ... والله انا كذابه ... مش باعرف

المهم عيطت وانا قلبى ضعيف بقى ...

وفى يومها بعد ما خلصت نزلت اروح مشوار

وبافكر فى اللى حصل وفجأه ...

تطلع لى عربيه نص نقل فوق الرصيف

وتخبطنى فى دراعى ... حسيت انها رساله من ربنا

انى لازم ولابد امتنع عن الحوارات دى

الحمد لله الحادثه مرت بسلام

رجعت البيت رميت الكوتشينه

وامتنعت عن شرب القهوه 

كل الرغى اللى فات معلش 

بس عن جد كان لازم اقوله 

عشان نتعلم ان الموضوع كذب وهبل

وماحدش يجرى ورا الموضوع ده خالص مالص