تعلمت من الحياه .....

>> السبت، 23 يناير 2016



كل يوم بيمر عليا باتعلم فيه حاجه جديده

ممكن تكون كلمه . .. او حتى درس ... او يمكن حكمه ..

والبوست النهارده عشان اتكلم عن شويه حاجات اتعلمتها

 ولسه باتعلم  وياما هاتعلم 


امسك بايديك وسنانك فى كل حاجه حلوه فى حياتك

 حتى لو كانت حاجه بسيطه جدا


فى كلام عمره ما يقدر يعبر عن اى حاجه

وفى صمت بيقول ويعبر عن كل حاجه 


فى ناس زى الورد مافيش زيهم

وفى ناس الحمد لله ان مافيش زيهم 



الاقربون مش على طول اولى بالمعروف


فى انسان لو عشت عمرك كله تعرفه

 ممكن يحصل موقف واحد فى ثانيه واحده

تكتشف انك ولا تعرف عنه اى حاجه وكان مجرد غريب 


ربنا يكفيك شر اللى عنده اكتر منك 

بس للاسف مش عارف يبقى زيك



الاصدقاء درجات اما المعارف هم أنواع


فى النهايه ...

خليهم يحكوا لبعض ويحكوا كمان فى بعض

يصدقوا مع بعض ويتخيلوا مع بعض

حلال فيهم اللى بيقولوه على بعض فى ظهر بعض 

انت بقى استمتع بحياتك بعيد عنهم لانهم زى بعض




33 التعليقات:

محمد التركى 23 يناير 2016 4:30 م  

رؤؤؤؤؤعه يابطه كلام فعلا بنعيشه في حياتنا وبنقابله كل يوم وللاسف من اكتر الحاجات السلبيه في حياتنا اننا بنعرف ناس عمر بحاله وفي لحظه نلقيهم ناس تانيه زاي ماقولتي بالظبط
يسلم قلمك وقلبك يابطه

مدونة رحلة حياه 23 يناير 2016 5:17 م  

السلام عليكم
شكرا للحياة التى تهدينا تلك الحكمة فلولا مقابلة هؤلاء الأشخاص لما اكتسبنا تلك الخبرات ومن كل محنة تولد منحة
شكرا لك زهراء

norahaty mo 23 يناير 2016 7:36 م  

ااااايه الكلام الحلو دا
كله مضبوط وصح الصح.

Gamal Abu El-ezz 24 يناير 2016 11:24 ص  

الحياة مدرسة كبيره
ودائما لكل قاعده شواذ
مش دائما فيه قاعده ثابته لاى حاجه أو اى شخص
ممكن يكون إنسان طيب وورا الطيبه دى عايش انسان همجى لكنه مش دائما بيظهر
قيسى كل حاجه على كده
موضوع جميل
وزهره تضاف إلى بستانك الرائع
مودتى وإحترامى

Ebtesam Hoseen 25 يناير 2016 1:17 م  

مساء الورد عليكى
جميل طرحك جدا وفعلا الانسان بيعيش علشان يتعلم
والاهم انه ماينساش دروسة فى الحياه ويعمل بيها
ربنا يسعدك حبيبتى كل الود

قمر وليل وغيوم 26 يناير 2016 11:58 م  

زهراء الجميله
انتى اثبتيلى بكلامك ده اننا نعيش بواقع لا يناسب اعمارنا
انتى عندك كام سنه عشان تتعلمى كل الدروس دى وتفهمى حقيقه الناس والدنيا كده؟!!!!
السؤال ده مش ليكى بس ده ليا انا كمان
احييكى على البوست الرائع اللى مضمونه كبرنا قبل الأوان

زهــــراء 1 فبراير 2016 11:25 ص  

محمد التركى
*-*-*-*

يا هلا بعد طول غياب منور المدونه والله ...

فيه مثل بيقول تعرف فلان اعرفه عاشرته لا يبقى ما تعرفوش ... قمة الوجع انك تبقى ماشر فلان وعارف كل حاجه عنه وفجاه يحصل موقف تكتشف انه بقى غريب عنك ولا كأنك شوفت او حتى قابلته
ربنا يجعل نصيبك فى الناس الرائعه اللى زيك يا محمد

بلاش تقطع الزيارات عن المدونه

زهــــراء 1 فبراير 2016 11:27 ص  

مدونة رحله حياه
*-*******

وعليكم السلام ورحمة الله وبركاته

عندك حق يا محمد كل لما الواحد بيقابل ناس بيكتشف حاجات جديده سواء حاجات سلبيه او ايجابيه المهم انه يتعلم وماحدش بيتعلم ببلاش

نورت وشرفت

زهــــراء 1 فبراير 2016 11:31 ص  


norahaty mo
*-*-*****

دكتورتى الحبيبه الغاليه

الكلام حلو عشان العيون اللى شافتها عيون ناس حلوه

زهــــراء 1 فبراير 2016 11:34 ص  


Gamal Abu El-ezz

*****--*****-*-**

مستر جمال

الحياه اكبر مدرسه ممكن نتعلم فيها ومنها
على الدوم كل الناس بتقول انى اجتماعيه وانا كمان باقول على نفسيى كده انى اجتماعيه بشكل مبالغ فيه ومهما كنت فاكره انى شوفت نماذج كتيره من البشر لازلت باقابل نماذج عجيبه كل فتره وكانها رساله من الحياه انتى لسه فى ناس ما تعرفيش عنهم حاجه

تحياتى وتقديرى لتواجدك

زهــــراء 1 فبراير 2016 11:36 ص  

Ebtesam Hoseen
*-*-***-*-***

صباح السعاده والسكر الزياده

اتمنى انى افضل فعلا فاكره الدروس اللى اتعلمتها من الحياه عشان ما اقعش فى اخطاء تانى

كل الدعوات بالسعاده والنجاح لكى يا سومه يا قمر

زهــــراء 1 فبراير 2016 11:41 ص  

قمر وليل وغيوم

***--*--*-***

صباح السعاده على عيونك

بالنسبه لسؤال عندك كام سنه احب اقولك انى بنوعية الناس الى قابلتها واتعاملت معاها يبقى فوق ال 100 سنه ولو عمرى عن طريق الخبره فى الحياه يبقى سنى فوق ال 15 سنه عمر الناس مش بسنه اللى موجود فى بطاقة الرقم القومى وانما بحصيلة التجارب اللى شافها ومريت عليه فى حياتى

ربنا يكرمك يا حبيبة قلبى ويفرحك ويسعدك

قمر وليل وغيوم 2 فبراير 2016 12:56 ص  

ربنا يفرح قلبك انتى كمان ياقلبى
العمر كله ليكى حبيبتى
اموااااااه
بوسه كبيره ليكى


Free CursorsMyspace LayoutsMyspace Comments

    © بالحب اتجمعنا. Friends Forever Template by Emporium Digital 2009

Back to TOP