مــكان فــى القــلب ....

>> الاثنين، 2 مارس 2015






فى حياة كل انسان هناك اماكن قريبه من قلبه



يحن اليها فى كثير من الاوقات



يشتاق الى معالمها وتفاصيلها



دعونى اتحدث عن المكان الاقرب



الى قلبى وعقلى وشعورى تجاهه 


كلما دخلت اليه اشعر اننى فى منزل وامامه حديقه



وحينما تصل الى صالة الاستقبال تندهش من الاثاث



لانك لا تعلم هل هو بالفعل غالى الثمن



ام انه بسيط ولكنه رقيق وشيك



وحينما تجلس لبضع ثوانى



تبدا الروائح الفواحه فى الدخول الى انفك



ولا تعرف ما نوعية هذه الروائح 


هل هى رائحة شجرة المسك التى شاهدتها



فى الحديقه قبل لحظات



ام رائحة تلك الباقه من الورود التى تقبع


على المنضده الاقرب منك


ام رائحة الياسمين التى يعشقها من يملك هذا المكان



ام رائحة اطعمه يفوح عطرها من المطبخ



لا تعلم من اين تاتى الموسيقى



وهل هى عربى ام غربى



لا تعلم كم طال الوقت بك وانت جالس بمفردك



ولكن تشعر انك مع بشر يحبونك ويفهمونك



هذا كان حالى مع المكان



اما الان فلا اكاد اقترب منه



حتى يفزعنى منظر العناكب التى تطل عليه



من كل الاركان



وكم يحزننى كم الاهمال الذى اصاب الحديقه



وكلما حاولت الدخول اجد ما يفزعنى



ولا استطيع الاقتراب



هذا حال بعضنا مع الاماكن التى يحبها



ويحزن عندما تتغير معالمها



لكل منا مكان فى القلب



دعوه لنتحدث جميعا



عن الاماكن الاقرب لنا




59 التعليقات:

قمر وليل وغيوم 2 مارس 2015 3:26 م  

زهراء الجميله المتفتحه
اتمنى اكون اول تعليق

زهــــراء 2 مارس 2015 3:29 م  


قمر وليل وغيوم
*-**-*-*-*


اول تعليق يا قمرى اطمن هههههههههههههه المدونه بتاعتك بقى وهتلاقى فى غدا فى التلاجه كمان

قمر وليل وغيوم 2 مارس 2015 3:37 م  

الحمد لله اول تعليق
ازيك ياقمر وحشتينى
تعرفى انا سرحت فى كلامك كتير اوى اوى لان فى اماكن غاليه عليا اوى وبعشقها
وجميل انك دعتينا نشاركك
انا بقى ياسيتى بحب اوى المنصوره لاسباب كتير
من ضمن الاسباب انى وانا صغيره كنت كتير بزور خالتى فيها وكنت ببات معاها ومنظر بيتها البسيط كنت بحبه وكنت بحب اقف فى البلكونه واشوف الشارع واسمع صوت العربيات وكان فى شباك تانى بقه بيطل على جنينه وشجر وورد واطفال بتلعب
وشباك تانى بقه بيطل على منظر فراخ وبط وكتاكيت يالله بحب المنظر ده
وشباك بقه ببطل على مسجد ومحلات كنت بحب كل المناظر دى
انما الشارع نفسه كنت بحبه اوى وكنت بحب انزل السوق اشترى الطعميه اللى كلها سمسم وسوخنه
ياه اما بعد حوالى عشر سنين واكتر وشوفت نفس المكان بس خالتى عزلت منه قد ايه شكله بقه كئيب واتغير اوى اوى
غير بقه انى بحب اسواق المنصوره وكوبرى المنصوره وموقف المنصوره وكشرى المنصوره هههههه كل حاجه ليا هناك ذكريات جميله
وفى بقه مكان تانى بعشقه وبحس فيه بحاجات غريبه
مكه
بعشق مكه بطريقه صعبه
هناك بلاقى روحى فى كل شارع من شوارعها بحس كإنى عارفاها من زمان
وبحب اوى ابص على جبال مكه
بجد بتسحرنى
خيال
انما الحرم بقه
يالله عالراحه النفسيه والروحيه
شكرا يازهراء على موضوعك الجميل اللى خلانى افتكر حاجات جميله

قمر وليل وغيوم 2 مارس 2015 3:38 م  

اووووو
ياترى فى ايه عالغدا
ههههههههه اتمنى كشرى

زهــــراء 2 مارس 2015 3:42 م  

قمر و ليل وغيوم

-*-****--

الغدا دجاج مسلوق وشوربه عشان البرد وملوخيه وارز بالشعريه ينفع ولا ايييه انا قولت اقولك علي الغدا قبل ما اقرا تعليقك

زهــــراء 2 مارس 2015 3:50 م  

قمر وليل وغيوم
-*-****-*****

قمره يا قمره

انتي عارفه اني سرحت في كلامك وتخيلت المنظر من كل شباك وااووو مناظر رائعه كل المناظر اتغيرت عن زمان القبح وضع بصامته فى كل مكان وعلى اى شئ حلو حتى مجرد اننا نتذكر لحظه حلوه خلااااص الموضوع انتهى
هو انتى اصلا من المنصوره او عشان كنتى بتروحى عند خالتك ؟؟

انتى عارفه انى باعشق المدينه المنوره اكتر من مكه وباعشق اهلها والطرق وكل حاجه فيها يمكن لانى قبل ما اسافر اتقال لى ان المدينه شبه الاسكندريه ولانى باعشق مدينتى حبيت المدينه يمكن مكه لها سحر خاص فى الحرم المكى بس برضه الحرم النبوى بالنسبه لى له سحر خاص جدا جدا وراحه غير عاديه مجرد انى ابص من شباك الفندق عليه كنت باعشر بالامان
ربنا يجمعنا فى سجده فى مكه عن قريب

انتى منوره وعم جد حروفك بتنور المدونه ولو حبتى تحكى عن اى مكان تانى تحت امرك فى اى لحظه يا قمر التدوين

قمر وليل وغيوم 2 مارس 2015 4:08 م  

مممممممم
طب بصى ندخل الدجاج المسلوف فى الفرن تحت الشوايه ونرش عليها شويه فلفل وجنزبيل ورشه ملح ونعصر لموووون ونسيبها تتحمر تحت الشوايه
ايه رايك؟

قمر وليل وغيوم 2 مارس 2015 4:15 م  

حبيبتى زهراء
لا انا مش المنصوره انا فى محافظه تانيه قريبه منها
تعرفى انى بزعل اوى اما بخرج من مكه واما اروح المدينه اتعب جسديا ونفسيا
يمكن لان فى المدينه كان غندى امل اشوف قبر الرسول صلى الله عليه وسلم لكن نحن معسر النساء محرومين من ده
فى بينا وبين قبره ومنبره وبيته حاجز كبير حتى منقدرش نبص نشوف اى حاجه يادوب بس نصلى فى الروضه ورا الحاجز وبس
ده بيخلينى زعلانه اوى لانى نفسى اشوف قبره واكلمه من غير حاجز بينا
انا هناك فى المدينه اتشاكلت مع واحده من الستات اللى واقفين حراسه غند الحرم النبوى واسلوبها كان وحش اوى اوى
انتى بقه فى المدينه الفندق بتاعك كان قدام الحرم
لا انا بقه كنت بعيد شويه وكان شباك غرفتى فى الفندق بيطل على جبل أحد
قد ايه رائع وجميل

رحاب صالح 2 مارس 2015 5:16 م  

مش عارفة
بس انا بالنسبة الاماكن مرتبطة معايا بالأشخاص
وفي اماكن مش عايزة ادخلها عشان مرتبطة معايا باشخاص
مثلا المدرسة الي كنت بعمل بها من قبل برغم حبي لها لا استطيع ان اعود إليها لأن لي ذكريات جميلة جداا هناك مع صديقتي التي توفيت ولا احب ان اذهب هناك حتي لا اتذكر انها ماتت
احيانا بحس انها لسة عايشة
برغم اني بدعي لها في كل صلاة
....
معلش انا كنت مشغولة شوية في المدرسة عندي مسابقات كتير الفترة دي
عشان كدة مقلة في التعليق والتدوين
مساء البنفسج

مدونة الفرسان 2 مارس 2015 5:57 م  

بصراحة مش عاوز أفتكر أحلى أيام حياتى عشان بحزن أوى لما أفتكرها وكأنها كانت حلم بالنسبة لى وفجأة عى رأى هانى شاكر كله راح كله راح
الله يرحم أيام زمان
كل ما أروح القاهرة وأفوت عل معالمها الأثرية والسياحية وسينمات القاهرة ومحلات وسط البلد ومظاعم الحسين والفتة بالكوارع تذرف الدموع من عينى على الأيام الخوالى التى عشتها مع عمتى وإبن عمتى
يرحمهما الله ويسكنهما فسيح جناته
أناآسف على المود الحزين ده
إنت السبب فيها يا زهراء
هههههه

زهــــراء 2 مارس 2015 6:31 م  

قمر وليل وغيوم
.........

انتي تعملي اللي تحبيه في الفراخ نشويها على نار هاديه أو نخليها ونحمرها كله ينفع ده الواحد يتشرف لما يأكل عيش وملح معاكي ليا الشرف

زهــــراء 2 مارس 2015 7:03 م  

قمر وليل وغيوم

في ناس كتير بتعشق مكه ويمكن هي مرتبطه عندي اني أول مره ازورها ماما تعبت جدا جدا جدا يمكن المكان ارتبط بنوع التعب واني كنت قلقانة عليها بشكل غير طبيعي
يوم زياره الروضه الدنيا كانت زحمه بشكل مبالغ فيه والناس بتعمل حاجات عجيبه غريبه بس راحه نفسيه غير عاديه لما صليت هناك وكنت أتمنى اقعد شويه واصلي كمان وكمان
انتي فكرتيني بآخر يوم لنا في المدينه وآخر شروق الشمس شوفته هناك والشمس بتظهر وتطل علينا من بين القبه الخضراء اللي تحتها قبر الرسول المنظر كان تحفه ياااااااااااه احلى أيام يارب تتكرر الزياره ونكون صحبه في حب الله
جبل أحد كمان تحفه والحمد للتاني محتفظه بصور لكل الأماكن ماعدا داخل الحرم النبوي زي ما انتي عارفه ممنوع الدخول هناك بأي حاجه

عن جد مستمتعه بالكلام معاكي

زهــــراء 2 مارس 2015 7:57 م  

رحاب صالح

......

ميس روبي....
كده برضه المدرسه وشغلها يبعدك عننا بالشكل ده على العموم منتظرين منك بوستات حلوه كالعاده
غالبا الأماكن مرتبطه بالأشخاص واحنا بنعمل ذكريات المكان من الأشخاص اللي تواجدت فيه وأحيانا تجبرنا بعض الذكريات اننا نبتعد عن الكثير من الأماكن لأننا تشاركنا مع من أحببناهم في تلك الأماكن...
ربنا يرحم صديقتك ويغفر لها....
ربنا يجعل كل الجاي عليكي خير وسعاده

زهــــراء 2 مارس 2015 8:06 م  

مدونة الفرسان

.....

يا هلا بصاحب الاحتلال الكبييييير وراح عليك اول تعليق ☺ واكبر احتلال كمان....
تعجبت أوي لما قولت انك بتحزن لما تفتكر أجمل ايامك ليه بقى بتحزن بالعكس الواحد يفرح ويدعو لمن شاركه تلك اللحظات ويتمنى أن تكون اللحظات القادمه أجمل وتحمل في طياتها ذكريات أجمل وأروع وبعدين انت ضحكت علينا فين الذكريات الحلوه اللي فيها عبق الفته والممبار والفشه ورحمه الرأس كمان هههههههههه
نورتني عن جد والمدونه تتشرف بالاحتلال الكبييييير

زهــــراء 2 مارس 2015 8:07 م  

قمر وليل وغيوم

تسلمي يا قمر التدوين ☺☺☺

مدونة الفرسان 2 مارس 2015 9:56 م  

خلاص بقى مبأش احتلال ولا دياولو
أكيد فيه حد ضربنى عين
هههههههه
أكيد طبعاً مقصدشى إنت
هههههههه
أربنا يسعد أيامك
ويبارك فى عمرك
أما عن مزاحى معكى فى التعليقات
فأنا أعتبرك أختى الصغيرة لروحك الحلوة وخفة ظلك
إن كان هذا يضايقك فلن تحدث مرة أخرى
خالص الإعتزاز والإحترام لأخت لم تنجبها أمى

زهــــراء 2 مارس 2015 10:04 م  

مدونه الفرسان

يا خبر ابيض ليا الشرف والله يكون لي اخ اتشرف به وعن جد باكون مبسوطه من القفشات والتعليقات واتمنى كمان نعمل احتلال انا وحضرتك في إحدى المدونات واتفرج بقى على الاحتلال حضرتك تشرف وتنور بس وانت جاي هات معاك حاجات حلوه مره كنافه بالبندق ومره بقلاوه اختك الصغننه بتحب الحلويات هي الاخوه ببلاش يا عمنا هههههه

norahaty mo 2 مارس 2015 10:22 م  

المكان عندى
جماله يأتى من حبى
لأصحابه فأذا ما رحلوا
رحل معهم حبى لهذا المكان

norahaty mo 2 مارس 2015 10:23 م  

بس تصويرك للمكان
بكلماتك اكثر من رائع
تسلم أيديكى

زهــــراء 2 مارس 2015 10:37 م  

دكتورتي الغاليه نورا

المكان الرائع بالأرواح الرائعه ربنا يجعل نصيبك في الخير

زهــــراء 2 مارس 2015 10:41 م  

دكتورتي الغاليه نورا
مش عارفه اقولك على كلامك الرائع وكلماتي مجرد حروف بسيطه تستمد جمالها من عيون من قرأها وعلى فكره المكان اللي اتكملت عنه مكان معنوي لكنني اعشقه

قمر وليل وغيوم 3 مارس 2015 12:35 ص  

هههههه
شكلى حسدتك
اكيد انا اللى ضربتك عين

P A S H A 3 مارس 2015 4:12 ص  

المكان الأقرب بالنسبة لي شارع فيصل وبالنسبة للشغل شارع الهرم
ههههههههههههههههههههههههه

زهــــراء 3 مارس 2015 11:38 ص  

ٌقمر وليل وغيوم

ياريت كل العيون مثل عيونك وتحسد بطريقتك انتى قمرايه

زهــــراء 3 مارس 2015 11:42 ص  


P A S H A
*-****-*-*

شريف باشا

يا هلا يا هلا ...

كده المكان الاقرب لك فى الجيزه وانا باعشق الجيزه من عشقى لاهلها اجمل صحبه واغلى الناس ......
بالنسبه لشارع الهرم ياترى الاقرب لك بيكون بالليل او بالنهار هههههههههه فاهمنى طبعا :P



محمد سلامة 3 مارس 2015 4:09 م  

كل مكان هادى وبسيط بيعجبنى
بس عندى سؤال ممكن الواحد يعشق مكان مارحوش قبل كدة وحاسس إن فيه كل الراحة والأمان ؟
ده اللى حاسه مع مكة
يارب أروح :)
تحياتى

زهــــراء 3 مارس 2015 5:47 م  

محمد سلامه

......

أستاذ محمد ربنا يوعدك بزيارة لمكه وتكون عن قريب.....
اكيد طبعا ممكن تحس بالراحه والأمان في مكان عمرك ما زرته أو شوفته وأعتقد أن مكه والمدينه ينطبق عليهم الكلام ده لأسباب كتير أهمها أن القبله التي نصلي لها هي مكه أو بمعنى أدق هي البيت العتيق في مكه
والقياس مع الفارق انك ممكن ترتاح لحد بمجرد أن حد تاني بيحكي عنه وهكذا....
بس عاوزه وعد من حضرتك لما تزور مكه المكرمه و المدينه المنوره تقولي هترتاح في أي مدينه فيهم اكتر لاني باكون في قمة الراحه في المدينه

دعواتي أن يحقق الله لك كل ما تتمناه وأكثر

زهرة الحياة 3 مارس 2015 7:59 م  

استاذة زهراء
دائما اقول ان الوقت الممتع ليس بحلاوة المكان وانما بالصحبة
فبالصحبة والذكريات يكون المكان من اجمل الاماكن بالرغم من انه من الممكن ان يكون لا شىء
دمتِ بخير

زهــــراء 3 مارس 2015 8:02 م  

زهرة الحياه
-*-***-*-

زهــوره الاموره

الله على الكلام الرائع عن جد الصحبه هى اللى بتعمل اجمل الاماكن حتى لو المكان بسيط الصحبه بتخليه روعه والعكس صحيح

يارب كل اوقاتك رائعه ووكل ايامك القادمه اجمل واروع

Gamal Abu El-ezz 3 مارس 2015 11:24 م  

زهراء

المدونة ما شاء الله جميلة وبحيكى عليها
وكمان فيها مدونين كتير لهم وزنهم فى عالم التدوين فده دليل كافى إنها مدونة على مستوى زوارها .

بالنسبة للموضوع وفكرته عجبتنى جدا يمكن فيه أماكن بتتغير بعد فتره وكان ليها مكان خاص فى قلوبنا بس أحيانا فرق السن من الطفولة للشباب للشيخوخة مع ثبات المكان هو الى بيفقدها قيمتها .

الأماكن الى بحبها الحمد لله معظمها موجود والبعض خلاص انتهى وجوده زى مثلا فى المكان الى انا ساكن فيه كان زمان فيه أشجار توت وكافور وجنزوير وصفصاف وفيكس وأنواع تانيه كتير وكانت موجوده بكثره لمجرد فكرة توسيع الطريق كل ده اتقطع. طبعا الجلوس فى ظل شجرة قديمة فى عمرها بيكون بالدنيا كلها وفيه راحة نفسية وعقلية كبيره .
واى مكان كان له ذكرى جميلة فى طفولتى ده بيكون المكان المحلل لقلبى لأنه بيرجعنى لإحساس الطفل

شكرا على المدونة والتدوينة الجميلة

Tarkieb 4 مارس 2015 9:21 ص  

اولا ناخد المركز الاول م النهاية هههههه...عارفة يا بطة احلي مكان بالنسبة لي بجد هو ايه؟ كان سور السيدة زينب يوم الجمعة كان بالنسبة لي كدة ولا سور الازبكية بتاع الكتب ...كانت الكتب اجدع كتاب فيها تقريبا بربع جنيه وكنت بلاقي درر ومعايا لسة كتاب الماني والله لسه بقري فيه من ساعتها

زهــــراء 4 مارس 2015 1:44 م  


Gamal Abu El-ezz

*-**-*-*-*-*-*-*

استاذ جمال

اهلا وسهلا بحضرتك فى اول زياره وان شاء الله مش تكون الاخيره

المدونه هنا وما اكتبه فيها مجرد حروف وبسيطه تتجمع لتكون كلمات واجمل ابسط من اى شئ لكنها تستمت جمالها من عيون من يقرأ ومن يعلق وعن جد اتشرف بتلك الصحبه الرائعه ولا ازكى اى انسان فيهم على الله ربنا يسعد قلوبهم جميعا

كل مرحله عمريه بيكون لها المكان الخاص بها وبكل تأكيد نتأثر نحن بكثير من العوامل اهمها عامل السن والنضج والتجارب التى تضعنا فيها الحياه وايضا الصحبه التى شاركتنا المكان

فكرتنى بالفيلا اللى كانت امامنا وانا رايحه املدرسه الصبح كان فيها شجرة فل على الباب معلقه فوق الباب بشكل جمالى اكتر من رائع وفى الصباح الباكر تفوح الرائحه امر من تحتها لالتلقط بعض الفل اللى وقع على الارض وفجاه قرروا انهم يهدموا الفيلا وهما بيهدموا الشجر كنت حزينه من جوايا وكنت سامعه صوتها وهى تبكى ياااااه ذكريات رائعه

عن جد سعيده جدا جدا بتشريفك وان شاء الله على الدوام اكون عند حسن ظن حضرتك

زهــــراء 4 مارس 2015 2:17 م  

زهــــراء يقول...
Tarkieb
-*-***-*-

تيكوووو

اولا انت اول من علمنى التدوين وكيفية التعليق وعمل اكونت وحتى لو التعليق بتاعك اخر تعليق لك فضل فى انك الاول فى انك معلمى .....

اقسم بالله كنت متوقعه انك لازم تتكلم عن السيده زينب والذكريات اللى فيها
رائع انك لسه بتقرأ تقريبا كل اللى اعرفهم امتنعوا عن القراءه من فتره طويله بس بفضل الله لازلت اقرا كل يوم كعادتى ....
هو الكتاب كان كبير للدرجه دى ولسه بتقرا فيها من وقتها ههههههههه فكرتنى احنا كمان عندنا كان فى النبى دانيال باعه كتب بس مش عارفه اختفوا او لسه متواجدين انت عارف بقى ان معايا كتاب لعباس محمود العقاد اسمه ساعات بين الكتب باقرا فيه من ايام الثانوى يعنى الكلام ده من تلات اربع سنين ومش تضحك هههه وتقولى لا من سنتين

اجمل ايام واحلى ذكريات مريت عليك وان شاء الله ايامك القادمه اجمل واحلى وتعمل ذكريات من نوع اخر وبرضه تحكى لنا عنها.....

بتشرف مكانك يا تيكو والمدونه بتنور بتواجدك على الدوام

غير معرف 6 مارس 2015 7:55 م  

زهورتى

الاماكن الجميله بالناس اللى فيها وكل اللى فات كان جميل وياريت يرجع من تانى


بدون توقيع

غير معرف 6 مارس 2015 7:56 م  

غالبا يا بطوط الاماكن مرتبطه بالاحداث اللى شهدها المكان
المكان مش عباره عن جدران وفرش وحاجات من النوعيه دى المكان بالناس اللى كانت متواجده فيه وانا قولت لك اجمل مكان كان فين صح ....

إســــلام

زهــــراء 6 مارس 2015 9:03 م  

غير معروف " بدون توقيع "

روح قلبى ....

يارب كل ايامك رائعه وجميله والجاى عليكى اجمل واحلى بادعى لكى من قلبى

زهــــراء 6 مارس 2015 9:07 م  


إسلاااام

فين الاكونت بتاعك يا عمى ؟؟؟ راح منك بسبب قلة الاستعمال ؟؟؟ معلش والله مش فاضيه ارجعه ...
انا عارفه ارتباطك بالناس مش بالمكان يارب ايامك الجايه احلى واجمل يا ابو ساره يا غالى انت
انت عرفت الطريق وهارجع لك الاكونت ان شاء الله عشان فى انتظارك فى البوست الجاى يهمنى رايك اوى اوى هههههه

Ebtesam Hoseen 9 مارس 2015 12:20 ص  

مساء الورد عليكى

سعدت كتير بمروى على مدونتك وجميل حرفك وطرحك الراقى

دام نبض قلمك ورشاقة حرفك

كل الوزود

زهــــراء 9 مارس 2015 2:01 م  

Ebtesam Hoseen

*-*-***-*-*-

صباح الفل ومسا الياسمين على الناس الرائعين الحلوين ...

تسلمى على حروفك الرقيقه الرائعه و رنا يديم الود والتواصل وفى انتظارك على الدوام انتى عرفتى طريق المدونه والمكان بتاعك تنورى فى اى لحظه

شركة تنظيف منازل بالرياض 30 نوفمبر 2015 1:07 ص  

Comprehensive Corner company is the best شركة تنظيف منازل بالرياض where criticism best cleaning services we be the best we have شركة تنظيف مجالس بالرياض to provide cleaning councils services and شركة تنظيف بيوت بالرياض and this for the convenience of our customers and here شركة تسليك مجارى بالرياض and even our services are not only dependent on the Riyadh there شركة مكافحة حشرات بجدة until we spend together here on insects and تنظيف منازل بالرياض


Free CursorsMyspace LayoutsMyspace Comments

    © بالحب اتجمعنا. Friends Forever Template by Emporium Digital 2009

Back to TOP