حدث بالفعل ....

كان هناك يقف فى منتصف الطريق  .. يبكى ..

الجميع يسير فى طريقه دون حتى ان ينظر له

هو ينظر لهم جميعا ... عيونه حزينه

يتمنى ان يتوقف احدهم ليسأله عن سبب بكائه وحزنه

بكاءه مختلف ... صوته مرتفع ....

ما أن اقتربت منه حتى ارتفع صوته بالبكاء اكثر

لا اتحمل نظرات عيونه لى من خلف دموعه

لا اتحدث معه ... يسير بجوارى بخطوات ثابته

ندخل احد المحلات ... اطلب نوع الايس كريم المفضل له

يبدأ فى الهدوء نوعا ما ..

نظرات عيونه تسألنى كيف عرفتى النوع الذى أفضله

ابتسم له وابدأ فى الحديث معه ..

هو صامت .. يستمع .. يراقبنى ... يبتسم احيانا

فجاه يبدأ فى الحديث ... عن نفسه .. أحواله

استمع له ...  واستمتع بكلماته  

نخرج سويا من باب المحل ... مستمر هو فى الحديث

نظرات عيونه متعلقه عليا ...

فجأه يمسك يدى وكأنه يحتمى بها من غدر الشارع


يصمت قليلا ... أبادره بسؤالي عن عنوان بيته

يبدأ فى شرح ووصف المكان  ... اذهب به الى هناك

ما أن يرى بيته حتى يتمسك بيا اكثر

نظرات عيونه تتوسل لى ... يستحلفنى ان أبقيه معى

ان اخذه الى عالمى ... دنيتى .. لا يريد البقاء هنا

تنتهى القصه عندما سلمته الى اهله ...

ملحوظة بطل القصه طفل صغير فى مشاعره واحاسيسه

رغم انه رجل ناضج فى تفكيره وعقله وسنه

Read more...

من غير عنوان ....

فى أى لعبه بنقابل الوحش أو التنين فى  اخر مراحل اللعبه


بعد ما تكون قابلت كائنات لطيفه ظريفه خفيفه 


تخيل بقى لو قابلت هذا التنين فى اول مرحله


اعتقد الوضع هيتغير تماما ..


ده فى الألعاب وضحك وهزار وكده 


تخيل بقى فى حياتك ..........


انك تقابل هذا التنين فى اول تجربه فى حياتك



او ربما تقابل الوحش فى اول خطوه لك 



لازم تشكر هذا الكائن ايا كان المسمى بتاعه 


لان اللى هتشوفه بعد كده شخصيات عاديه بسيطه


شخصيات فى الحياه تتعايش ومتعايشه 


مهما قابلت بعد كده خلاااااااص انت قابلت الكبييير بتاعهم


مشكور ايها التنين او الوحش 

Read more...

زهراء ستايل 1

فى شهر ابريل من هذا العام قررت انى اعمل هاشتاج لنفسي

بصراحه مش فاكره السبب ايه  

 النهارده بالصدفه قولت اجمع الكلام بتاعى 

 قررت انقل لكم بعضه

وطبعا لان فى ناس مالهاش فى الفيس وحتى لو لها

الهاشتاج مخصص لبعض الاصدقاء 



كلام الناس ... نظراتهم 

اشاعتهم ...همساتهم

كل ما فعلوه ويفعلوه 

لن يضرنا فى شئ 

جميع الناس مقصرين ...محاسبين

لا تهتم بهم ولا تلتفت لهم 

رب الناس يكفينا شر الناس 


   **********

الحب اقتراب وجدان

وليس اقتحام كيان

*********

لو حسيت إنك مظلوم 

وكل الناس والدنيا جايه عليك

فكر مع نفسك شويه

يجوز انت ظالم وده عقاب ربنا ليك 

***********

فى كل مناسبه يتحدثون عن قطار الزواج

الذى يجرى ولا انتظره ولا ينتظرنى ..

العيب ليس فى القطار ولكنه فى حقائبي

الممتلئه بأحلامى ... أمنياتى

صموحى .. ضحكاتى .. خيالاتى

هى أثقل من أن يتحملها أى قطار عادى

هناك قطار خاص جدا سوف يتوقف فى محطتى ذات يوم

أو ربما طائرة من نوع خاص جدا .. من يدرى 


هذه بعض من كلماتى  البسيطه وان شاء الله هناك المزيد 

Read more...

هى والحذاء ...

كلما وقعت عيناها على ذلك الحذاء النسائى تذكرته

تذكرت لقائها الوحيد معه وحديثه وبسماته

لقد اشترت هذا الحذاء خصيصا لمقابلته

هى لا تفضل ارتداء تلك النوعيه من الاحذيه النسائيه

لكنها قررت ان تشتريه كى تقابله وهى بكامل انثوتها 

هو فى نظرها رمز للرجوله رمز للأمان والحنان

تتذكر تفاصيل كثيره عنه وعن خجله الواضح

عن مشاعره واحاسيسه حتى التى رفض ان يبوح بها

لقد كرهت هذا الحذاء بعدما ابتعد عنها لسبب غير معلوم

عادت الى حياتها تتعامل مع الجميع  كما كانت

تعامل جميع الرجال على انهم مجرد انسان فى الحياه وليس رجل 

تحاول ان تتناسى أمره وكذلك نسيت حذائها

كلما شاهدت حذاء حريمى فى احدى المحلات تذكرته

تذكرت من ظنت انه سوف يصبح رجل حياتها

وأمير احلامها وفارس ايامها

وبمرو الوقت اكتشتف انها لا يساوى اكثر من حذاء حريمى

ربما شكله أنيق وسعره مرتفع لكنه مجهد لها ولأقدامها

Read more...

دوائر العلاقات ...

الدائرة الاولى 

هى اقرب العلاقات الى القلب والعقل تضم الاصدقاء الاوفياء 

وبعض افراد العائله يشعر كل منكم بالاخر بدون كلام 

لا تخجل منهم وتتحدث معهم بتلقائيه تعلموا عن بعض ادق 

التفاصيل هى علاقه متماسكة ولا تهتز لأى حادث عابر لا نطلق 

عليها علاقة حب او صداقه ولكن هى راحة نفسيه الجميع 

يتعامل فيها مع الاخر على انه انسان ولا يجد تصنيف ذكر او 

انثى .

الدائرة الثانية 

 حينما تتلاقى الوجوه لا ينتهى الحديث فى كل الامور 

معظم افرادها كانوافى الدائرة الاولى ولكن ظروف الحياه قد 

تجبرهم على التراجع 


الدائرة الثالثة

 بها العديد من المعارف وهى  اكثر الدوائر عددا قد تصحب 

أحدهم فى دعواتك لانك تشعر به ولا تخبره فى هذه الدائرة كل 

واحد بيحكى للاخر عما يريد ان يخبره به قد يكون احد اطرافها 

كتاب مفتوح امام الاخر كل حسب قدرته قد يقفذ احدهم الى 

الدائرة الاولى .



الدائرة الرابعه


تضم معظم افراد العائله والكثير من المعارف علاقه روتينيه 

رسمية تعتمد على المجاملات التى لا تحمل اية مشاعر احاديثها 

ممله وعادة تكون فى السياسه واحوال البلاد قد تلاحظ ان معظم 

افرادها لديهم فضول لمعرفة كل شئ يخصك وفى المقابل لا 

يتحدثون عن أنفسهم اطلاقا هى علاقه متعبه .


الدائرة الخامسة 


تضم الزملاء والجيران والاقارب الذين لا تتبادل معاهم سوى 

الواجبات الاجتماعيه ولا يجمع بينكم اى حديث يستمر اكثر من

 ثلاث دقائق .

اخيرا وليس اخرا هناك علاقه لا يوجد لها تصنيف فى دوائر 

علاقاتى انسان دخل الى حياتك فجاه تقترب منه ويقترب منك 

يصبح كل منكم كتاب مفتوح امام الاخر ولا يستغرق الامر وقتا 

طويلا وتجد ان احد اطراف العلاقه قرر الانسحاب فجأة وبدون 

اية مقدمات هى علاقه مرهقه جدا ولابد ان تعلم ان هذه العلاقه 

تدخلت فيها المشاعر بشكل او بآخر.


هذه هى دوائر علاقاتى ماذا عنكم ... يلا نرغى 

Read more...

حدث بالفعل

من كام يوم قادتنى الظروف الرائعه انى اركب تاكسيى


واقعد جنب السواق رغم انى مش باحب كده


 بس نعمل ايه المضطر بقى يركب جنب السواق  


المهم فى بنتين قاعدين ورا الاولى انجى والتانيه ندى 


انجى كانت بتتكلم فى ودنى عادى يعنى

احنا فى مصر كلنا اخوات واهل


انجى : حاسه ان كريم خلاص مابقاش يحبنى زى زمان


ندى : هو واخد باله انك مش بتحطى مانيكير فى صوبعك

 اللى فيه الدبله

انجى : تصدقى ولا فارقه معاه عارفه مين بقى اللى اخد باله 


وسالنى هيثم اللى معنا فى الكورس


ندى : هيثم ده امور كده وشكله ابن ناس .....

انجى :  المره اللى فاتت اول لما دخلت القاعه قبل الكورس


 لاقيته بيقولى الايشادو بتاعك تحفه


ندى ......

انجى : وعجبته ريحة البرفيوم الجديد


ندى : وكريم قالك ايه على البرفيوم 


انجى : ولا فى باله اصلا ولما سالته قالى كلها عطور


 انا مش مركز مش باقولك مشاعره اتغييرت


انجى جه لها مكالمه من هيثم بيطمن عليها روحت


 او لسه فى الطريق وانا مرارتى اتفقعت من الحوار 

الطريق زحمه واتخنقت والست انجى مش عاجبها خطيبها


 اللى مش واخد باله من لون المانيكير وتسريحة شعرها


وان الروج مش عارفه اتنيلت وعملت ايه بس هيثم مركز


  وبتعمل مقارنه بينهم

هنا بقى عمو السواق دخل فى الحوار وقال :


 واضح ان هيثم ده ابن حلال


 ادى كريم صابونه انتم لسه على البر يعنى


السواق راجل كبير ومش طايق نفسه من الزحمه


 طبعا انجى وندى اصابهم خرس مؤقت وبعد تلات دقايق نزلوا


السواق بص لى وقال حاجه تقرف راكبين معايا من ساعه


وكل الكلام عن كريم وهيثم ابوهم على ابو اللى جابهم


بنات ..... ( اتخيلوا بقى سواق فى الزحمه كلامه هيبقى ازاى )


الرجل يا عين امه عمال يهرى فى نفسه وانا مبتسمه وساكته


لسه هانزل لاقيته بيقولى ما سمعتش رايك يا ابله فى اللى حصل


نزلت وانا باقوله الله يصلح حال البلاد والعباد


لاقيته بيقول الله ينور عليكى يا ست الكل كان فين رايك ده 

Read more...

بره نفسي ....

من كام يوم بافكر لو خرجت من نفسي وأتفرج على الناس

يا ترى مين بيحبنى بجد ومين بيمثل 

يا ترى مين بيضحك فى وشى ومن ورايا بيغشنى 

اتفرج بهدوء ......

يا ترى مين صادق وبيتعامل من قلبه 

اشوف افراحى واللى فرح معايا

واللى اتمنى لى الشر وزعل لسعادتى 

هاتفرج شوية على  ناس كانت بسمتهم غش

وضحكتهم فى وشى كلها شر

هارجع لورا شويه واتعلم ازاى اعرف أرد عليهم 

هاشوف حبايبى اللى الاهمال خلينا بعيد 

هارجع اقرب منهم وادعى لهم

هاعمل حاجات كتييييييييييير 

موضوع خيالى جدا ياترى لو قدرت تخرج بره نفسك هتعمل ايه 

Read more...

هى أنثى .....

هى أنثى تعترف بالحق

ولا تدعى الفضيله

لا تتمسك بأشباه البشر

واضحة الملامح جريئة القرار

تصنع الدنيا التى تعيش فيها

داخل منها حياه ليس لها اى علاقه بالواقع الكئيب 

لا تفضل خسارة البشر

تتجاهل الالم والحزن وكذلك الجروح 

لا تخبر أحد سر تفاؤلها

تؤمن ان كل شده لها مده 

عنها اتحدث تلك الرائعه فى حياتى ...

Read more...

اعـــتذار ....

فى بعض الاحيان ...


قد نخطئ ولا نظن اننا اخطأنا


فى حق أحدهم او فى حق أنفسنا 


تسير بنا الحياه وقد ننسى او نتناسى الاخطاء


وفجأه نتذكر الاعتذار ...


كلمة اسف ....


ربما نقولها فى وقتها الصحيح او بعد فوات الاوان


وتتعدد صور الاعتذار وتتنوع ايضا


ربما اخذت شكل كلمة اسف وبس


او تكون فى شكل اقرار  واعتراف بالخطأ


او تكون فى شكل دموع اعترافا بالخطأ


ايا كان شكل وطريقة الاعتذار 


تعلمت ان انظر فى عيون من أقدم لهم اعتذارى


حتى يسمعوا كلماتى  ويشاهدوا نظرات الاسف فى عيونى


ربما اكون قد جرحت قلب او ادمعت عين


ولكن ما اجمل ان اعتذر بعد خطئى


للاعتذار لمسه سحريه على القلوب


اليوم اقدم اعتذارى لنفسى اولا 


على تقصيرى فى حقها فى بعض الاحيان


اعتذر لكل احبابى الذين يتحملونى فى لحظات جنونى


اعتذر لكل من اخطأت فى حقه بدون قصد


تعالوا نشوف كل واحد مين زعلان منه


يحاول يعتذر له .... كلمة اسف مش هتكلفنا كتير


لكنها بتساوى كتييييييييييييير عند اللى بيسمعها 


يلا كده فكروا كده واعتذروا


ليس هناك متسع من العمر يا اصدقائى 

Read more...

رسالة إلي لمن يهمه الأمر 1.....

اياك أنك تطلب الاهتمام من أى انسان


اياك انك تضايق او تزعل من اى انسان اساء اليك


اوعى تكون فاكر الخير اللى عملته بيروح


كله عند ربنا ... وما كان ربك نسيا


مهما قدمت للبشر خدمات وجمايل وحاجات حلوه


اوعى تزعل ان الرد كان نكران للجميل


او تزعل لو حد فسر اهتمامك به غلط


او تتضايق ان كلمة شكرا كان بدل منها طعنه فى ظهرك


او تزعل ان اللى عملته اتنسى


مجهودك ... وقتك .... عمرك ...


كله محفوظ لك وهيترد لك فى الوقت المناسب


كل انسان طبعه بيظهر ويبان بعد فتره من الزمن


فيهم اللى هيقولك ظروفى ... احوالى ... دنيتى


الغالى بس هو اللى هيغليك


الصديق عمره ما يفكر يأذيك


الحبيب عمره ما يقدر يعكنن عليك


باقى البشر اوعى تتعب نفسك معاهم 


حافظ على علاقتك بكل الناس


وخلى لك اثر فى قلوبهم 


اوعى تدى لحد حجم مش بتاعه


عامل كل واحد على قدر عقله


خلى الخير اللى بتعمله يزيد ويزيد


وخلى لهم اثم ما يفكرون به


كلماتى هى رساله لمن يهمه الامر 

Read more...

طمن قلبك ♥ ♥ ....

أيوه انت طمن قلبك ....


كل حاجه بتعدى عليك فى حياتك لها حكمه وسبب


نظرنا ضعيف جدا ومش عارفين ومش فاهمين


شخصيتك بتتغير مع كل تجربه وكل موقف


احتمال حته منك ما ترجعش زى الاول


حياتك مش هتقف على اى حد او اى حاجه


كل واحد عنده حاجه ناقصه فى حياته


اللى فقد حد من اهله 


اللى مش عارف يتجوز اللى بيحبها


اللى مش قادر يبقى عنده ولاد


اللى كاره شغله واللى مش لاقى اصلا شغل


اللى فشل فى قصة حبه ..


اللى .... واللى ........


ظروفك مش حاجه تتكسف منها 


كل حاجه واى حاجه بتعدى عليك فى حياتك


 هى اختبار من ربنا .........


اقولك على حاجه غريبه الفيس بوك عامل حاجه كده


ذكريات من عمر فات ههههههه 


اقصد ذكرياتك وصورك من حوالى كام سنه فاتت


لما تبص عليها كل يوم هتلاقى حاجات غريبه عجيبه


مره كنت تافه ... مره حكيم .... مره عاقل 


هتلاقى ناس كانوا فى حياتك بتحمد ربنا عليهم 


دلوقتى الناس دى راحت وربنا عوضك باللى احسن منهم


هتلاقى حاجه كنت متأثر بها فاكر ان حياتك وقفت عليها 


فجأه هتلاقى ان كل حاجه فى حياتك بتمر 


الحلو بيمر والسيئ كمان بيعدى


كلنا بنتغير مافيش حد ثابت فى مكانه


اوعى تبص وراك خليك دايما باصص لفوق


اطلب منه كل اللى نفسك فيه 


اوعى تخجل من ربنا مهما كانت امانيك بسيطه


مهما قولت عليها مستحيله 


طمن قلبك وقول لسه اجمل يوم مجاش 

Read more...

وحشتنى دنيتى ....

فعلا وحشتنى دنيتى اللى كلها تفاؤل وامل فى بكره


كلامى اللى بيشجع الناس على ان بكره احلى من النهارده


كمية التفاؤل اللى بتكون معايا فى كل أحداث حياتى


بسمات وضحكات لا حدود لها اهديها لأى عابر سبيل فى حياتى 


اهتمام بالغريب زى القريب ...


مدينتى الفاضله التى اسعى لها واحاول بناء طوبه فيها



فجأه ..........


بدون مقدمات او بدون توقعات  أنسحبت من هذه الدنيا


يلاحظ المقربين  تغيير فى اسلوبى حتى كلامى


 بسماتى التى بتطلع ممزوجه بالوجع

حتى نظراتى تحمل تشويش واضح للجميع


فجاه الكل اجمع انه مش هيحكى


 وانما هيرد لى اللى كنت باعمله


الجميع ينصح بكلامى ويعاد على مسامعى مره اخرى


بس المره دى باسلوبهم الذى أعشقه

ابتسم من حديثهم وحروفهم التى اخبرتهم بها ذات يوم


الكل يتساءل امتى هترجعى الى دنيتك 


احد الاصدقاء يخبرنى على الدوام اننى مريضه بالتفاؤل والامل


والاخر يخبرنى ان فى رقبتى ناس كتير فى انتظار دفاعات ايجابيه

ابتسم لهم واحاول ان اجاهد كمية اليأس التى تسللت الى اعماقى 


رغم فرحتى بكلامهم ولانى لاول مره فى حياتى اسمعه منهم


لانه فى الاصل كلامى واحاديثى 


 راجعه تانى لدنيتى عما قريب ان شاء الله


 لكن لكل جواد كبوه 


ربما علينا ان نعيد ترتيب الاولويات فى حياتنا من جديد


 يمكن عين حسود ورشقت  


كل الشكر لمن يهتم ويطمئن ويشعر


كل الدعوات للناس المخلصه اللى فى حياتى


أنتم ثروتى فى هذه الحياه ...........


وحشتنى دينتى ....................

Read more...

تعلمت من الحياه .....

كل يوم بيمر عليا باتعلم فيه حاجه جديده

ممكن تكون كلمه . .. او حتى درس ... او يمكن حكمه ..

والبوست النهارده عشان اتكلم عن شويه حاجات اتعلمتها

 ولسه باتعلم  وياما هاتعلم 


امسك بايديك وسنانك فى كل حاجه حلوه فى حياتك

 حتى لو كانت حاجه بسيطه جدا


فى كلام عمره ما يقدر يعبر عن اى حاجه

وفى صمت بيقول ويعبر عن كل حاجه 


فى ناس زى الورد مافيش زيهم

وفى ناس الحمد لله ان مافيش زيهم 



الاقربون مش على طول اولى بالمعروف


فى انسان لو عشت عمرك كله تعرفه

 ممكن يحصل موقف واحد فى ثانيه واحده

تكتشف انك ولا تعرف عنه اى حاجه وكان مجرد غريب 


ربنا يكفيك شر اللى عنده اكتر منك 

بس للاسف مش عارف يبقى زيك



الاصدقاء درجات اما المعارف هم أنواع


فى النهايه ...

خليهم يحكوا لبعض ويحكوا كمان فى بعض

يصدقوا مع بعض ويتخيلوا مع بعض

حلال فيهم اللى بيقولوه على بعض فى ظهر بعض 

انت بقى استمتع بحياتك بعيد عنهم لانهم زى بعض

Read more...